رَسانک نیوز/ چارشمبے روچ 21 آبان ماہ 1404 ءَ، واش ءَ دھپابید ءُ اسکلآباد ءِ راہ ءَ ماں تاریک پنچشمبے 8 آبان ماہ سلاہ بندیں مردمانی مھمد شاھوزھی سپاہ ءُ امنیتی ادارہ آنے جھمنندیں کارندگئے کاروان ءِ سرا اُرش ءِ وھدا ٹپیگ بوتگیں سئے اُمیں گاٹ ءَ ویلئے سیزدہ روچ ءَ پد، ماں نادراہجاہ ءَ ساہ داتگ.
رَسانک ءَ اے گاٹ ءِ پجّار «یاکوب شاھوزھی»، ھُسین ئے چُک زانتگ۔ چہ ایشی ءَ پیسر «اسمائیل شاھوزھی»، ماں تاریک 9 آبان ماہ ءُ «نسراللہ شاھوزھی»، دادھُدا ئے چُک، ماں تاریک 10 آبان ماہ ءَ، کہ سجهیں مھمد شاھوزھی ئے گاٹ بوتگ اَنت چہ بازیں ٹپّان ءَ ساھش داتگ.
رَسانک ءِ ھال سرکنوکانے رِد ءَ، سپاہ ءِ اے کمانڈر ئے گاڑی گوں دگہ سئے گاڑیانی ھوری ءَ روگ ءَ بوتگ کہ سلاہ بندیں مردمان ءَ چہ نزّیک ءَ اے کاروان ءِ سرا تیرگواری کرتگ، مھمد شاھوزھی ءِ چار گاٹ ٹپیگ ءُ واش ءِ نادراہجاہ ءَ سرکنگ بوتگ اَنت۔ اگاں کہ مھمد شاھوزھی ئے جِند اے ویل ءَ رکّتگ بلے آئی ءِ گاڑی ءَ بازیں نُکس ءُ تاوان بوتگ.
مھمد شاھوزھی ماں بلوچستان ءَ چہ سپاہ ءِ جھمنندیں کمانڈر آن ءُ چئیریں ادارہ ئے ڈلگیں کارندگاں زانگ بیت۔ انّیگیں سال آن ءَ آئی دُزاپ ءَ کریم آباد دمگ ءِ بسیج ئے بُنجاہ ءِ کمانڈر ءُ سروک بوتگ. آئی سرکار ءِ ھلاپ زھرشانی کنوکیں بلوچانے پادلپاش کنگ، دُزاپ ءِ ھونیں جمے ءَ کُشگ بوتگیں مردمانے ھاندان آں لالچ ءُ اِنساپ لوٹوکیں ھاندان آنے بیہار دیگ ءَ مزنیں بہرے زورتگ. ماں تاریک 8 مہر ماہ 1401 ءَ مھمد شاھوزھی ئے ائیردستیں ٹولی دُزاپ ءِ چار راہ رسولی ئے دکان آنے مان دارگ ءَ ھور بوتگ.
داں انگت ءَ ھچ تنزیم یاں کہ گل ءَ اے ویل ئے زمہ واری نہ منّتگ.
Be the first to comment