رَسانک نیوز / جمے روچ ءَ 16 آبان ماہ 1404 ءَ دُزاپ ءِ مکی مسیت ءَ شهنوازی ءُ نارویی کبیلہ آنے میان ءَ سلاه کاری ءُ رازی نامے دیوانے برجم دارگ بوتگ. اے دیوان ءَ مولوی ابدلھمید دُزاپ ءِ جمے پیش نماز ءَ ھور سیستان ءُ بلوچستان ئے کماش ءُ اسپیت ریشیں مردماں دوئیں کبیلہ آنے سروک آن ءُ سنّی دینی زانتکاران ءَ بہر زورتگ.
اے دیوان ءَ گوشتانک دیوکان ءَ تپاک بوھگ ءُ کبیلہ ای جیڑہ آں چہ دور بیئگ ءُ ھمیں پیم بلوچ سماج ءِ ایمن کنگ ءِ سرا زور داتگ. دیوان ءِ گُڑسرا دوئیں نیمگ ءِ مردماں پہ جیڑہ ءُ ٹکّر آنے آسر کنگ ءُ نوکیں رھبندانے تَچکی ءَ پہ براتی ءُ تپاکی ءَ زندمان گوازینگ ءَ رازی بوتگ اَنت.
اے سلاھ دوستیں گامگیج پدا اے گپّ درا کرتگ کہ بلوچستان ءَ گوں کماشیں مردمانے میانجی گری ءُ دو نیمگی گپّ ءُ تران ءَ جیڑہ آں سندگ بنت ءُ ایشی پہ بلوچ سماج ءِ ایمن کنگ ءَ سوبداریں رھبندی اِنت.
Be the first to comment