چھبار ءَ بلوچے زھگی کہ چار روچ دیمترا سلاہ بندین ءُ بے پجّاریں مردمان ءَ بیگواہ کرتگ داں انگت ءَ آئی ءِ ھالے سرپدئے نیست اِنت

رَسانک نیوز/ جمے روچ 16 آبان ماہ 1404 ءَ، چھبار ءَ بلوچے چُکّے کہ چار روچ دیمترا سلاہ بندین ءُ بے پجّاریں مردمان ءَ بیگواہ کرتگ داں انگت ءَ آئی ءِ ھالے سرہدئے نیست اِنت ءُ امنیتی ادارہ آنے اے درگت ءَ دلگوش نہ بیئگ ءَ ھاندانے دل پریشانے گیش کرتگ.

رَسانک ءَ اے بلوچے چُکّئے پجّار «مزمل بلوچ»، 10 سالگ، مھسن ئے چُک ءُ بُندر ءَ چھبار ءِ نندوکیں مردمی زانتگ.

رَسانک ءِ ھال سرکنوکانے رِد ءَ، دوشمبے روچ ءَ سُہب ءِ ساھت 6:45 ءَ سلاہ بندین ءُ بے پجّاریں مردمان ءَ مزمل ءِ پت ئے گاڑی ئے دیم ءَ ماں شہر ءِ یک روڈی ءَ ھماں وھدا داشتگ کہ آئی وتی چُک ءَ وانگجاہ ءَ سرکنگ ءَ بوتگ۔ سلاہ بندیں مردمان ءَ گوں سلاہ ئے زور ءَ پت بیہار داتگ ءُ آئی ءِ اُوشت ءِ دیم گپتگ ءُ بے تِرِپ ءُ توارا چُکّ اِش آوار جتگ.

مزمّل ءِ بیگواہ کنگ ءَ چار روچ گوستگ ءُ داں انگت ءَ بیگواہ کنوکان ءَ گوں آئی ءِ لوگ ئے مردمان ءَ ھال اھوال نہ کرتگ۔ مزمّل ءِ پت ءَ گوشتگ: آئی ءَ گوں کسی ءَ دئے ءُ گِرے نیست نہ کہ گوں کسی ءَ جیڑہ ءُ دُژمنی‌ یے ھست اِنت۔ مزمل ءِ ھاندان ءَ اے نمبر شنگ کرتگ
09304430234
داں کہ اگاں بیگواہ کنوکان ءَ یاں کہ کسی ءَ جیڑہ ای یا جنجالے گوں آیاں ھست، اے نمبر ءِ سرا گپّ ءُ ھال بہ کننت ءُ اے پیم ءَ لوگئے مردمانی دل پریشانی کم بہ بیت. مزمل ءِ ھاندان ءُ سیاداں آئی ءِ بیگواہ کنگ ءِ ھال، اِنساپ دیوکین ءُ امنیتی ادارہ آں سر کرتگ، بلے داں انگت ءَ ھچ با اسریں گام گیجی پہ آئی ءِ شوہاز کنگ ءَ زورگ نہ بوتگ.