رَسانک نیوز/ مروچی جمے روچ 16 آبان ماہ 1404 ءَ، زابل ءَ بلوچے کہ بیست ءُ پنچ روچ دیمترا بیگواہ کنگ بوتگ، داں انگت ءَ آئی ءِ ھالے سرپدئے یا کہ دارگ ئے جاگہے باراوا ھالے دست نہ کپتگ۔ ھمیں گپّ ءَ لوگے مردم گیشتر دل پریشاں کرتگ.
اے بلوچے پجّار «امیرھُسین براھویی»، 23 سالگ، جلیل ئے چک ءُ بُندر ءَ زابل ءِ نندوکیں مردمی زانگ بوتگ.
رَسانک ءِ ھال سرکنوکانے رِد ءَ، 21 مہر ماہ 1404 ءَ، ھماں وھدا کہ امیرھُسین زابل ءِ شہرا ماں بئست ءُ ھُمینی روڈ ءِ چار راہ ءَ روگ ءَ بوتگ کہ چُنت سلاہ بندیں مردمان ءَ پہ زور وتی گاڑی ءَ سوار کرتگ ءُ بُرتگ.
اے ھاندان ءِ نزّیک آن ءَ گوشتگ: بیگواہ کنوکیں مردمان ءَ اے ویل ءَ پد گوں امیرھُسین ءِ ھاندان ءَ رابتا کرتگ ءُ پہ آئی ءِ آجو کنگ ءَ مزنیں زرّی لوٹتگش کہ چہ آئی ءِ ھاندان ءِ وسّ ءَ ڈنّ اِنت۔ ھاندان ءُ دمگ ءِ اسپیت ریشیں مردمان ءَ کوشست کرتگ، بلے بیگواہ کنوکان ءَ پہ کم کمّ ءَ زرّ ئے زورگ ءَ نہ منّتگ ءُ وتی رابتہ اِش بستگ.
امیرھسین ءِ بیگواہ بوھگ ءِ ماھی ءَ پد داں انگت ءَ کمتریں ھالے سرپدئے آئی ءِ باراوا دست نہ کپتگ ءُ اے گپّ ءَ لوگ ئے مردماں ھاس کار آئی ءِ مات ءِ دل پریشانے گیش کرتگ. زمہ واریں ادارہ آنے اے ویل ءِ سرا دلگوش نہ بیئگ ءُ رندگیری نہ کنگ ءِ سوب ءَ زابل ئے جھمنندانے ایمنی ئے باراوا دک پریشانے گیش کرتگ.
Be the first to comment