رَسانک نیوز/ یکشمبے 11 آبان ماہ 1404 ءَ، سمد ریگی بلوچے سماجی جُھد کارے کہ ماں تاریک 15 مہر ماہ ءَ چئیریں ادارہ ءَ چہ کارے سرا پہرہ ءِ بانک ملی ءَ دزگیر کرتگ ءُ پیسرا چئیریں ادارے دارگ جاہ ءَ بُرتگ ءُ پدا پہ دُزاپ ءِ بندیگجاہ ءَ شور داتگ، پد چہ بیست ءُ شش روچ ءَ یک ملیارد تومن ءِ زمانت ءِ سرا آجو بوتگ.
دیمترا رَسانک ءِ ھال سرکنوکان ءَ گوشتگ: امنیتی ٹولی آئی ءِ دزگیر کنگ ءَ رند لوگا بُرتگش ءُ بید چہ سرکارے ھکم ءَ لوگا تہا بوتگ اَنت۔ امنیتی ٹولی ءَ لوگ ءَ پٹ ءُ لوٹ ءَ ھور، لوگئے نندوکیں مردمانی زاتی سامان ءُ موبائل پئون پچ گپتگ ءُ دزگیر کرتگیں مرد ئے ھوار چئیریں ادارہ ءَ برتگ.
اے سماجی جُھد کار چہ دزگیر بئیگ ءَ پیسر، پہرہ ءَ لہتیں ناشر کار آنے چکّانے گون ءَ (دس دراجی) ئے ھال پاش کرتگ ءُ چہ سوبہ ءُ پہرہ ءِ کانونی ڈاکٹر آنے کار ءُ کردار ءَ شرگداری کرتگ ءُ گوشتگ: زمہ واریں ادارہ آنے اے باراوا رندگیری نہ کنگ ءِ سوب ءَ بازیں ھاندان آن ءَ وتی چکّانی گون ءَ ناشر کاری یے ھال رپوٹ نہ کرتگ ءُ دپ اِش داشتگ۔ آئی ءَ چہ اِنساپ ءِ ادارہ ءَ لوٹتگ اے ویل ءِ سرا دلگوش ءُ ڈوھ ئے کنوکان ءَ سزا بہ دنت.
پد چہ ایشی ءَ کہ سمد ریگی ءَ اے ھال پاشک کرتگ ءُ آئی ءِ دزگیر بوھگ ءَ رند پہرہ ئے جُست ءُ پرس کنوکیں ادارہ ءَ سئے ناشر کار پجّار ءَ رند دزگیر کرتگ.
رَسانک ءِ ھال سرکنوکان ءَ گوشتگ: مہر ماہ ءِ پیسریں ھپتگ ءَ دوازدہ سالگیں نودربریں بچلوکی چہ وانگجاہ ءَ پہ لوگ ءَ واتر بوھگ ءِ راہ ءَ سئے نپر ءَ آوار جتگ ءُ گوں آئی ءَ جنسی دس دراجی کرتگ ءُ چُنت ساھت ءَ پد چکّا شہر ءِ یک روڈی ءَ یلاک داتگ۔ ویلے روچ ءَ پنچ چُک گوں یک پژو گاڑیے آوار جنگ بوتگ ءُ پد چہ ایشی ءَ اے چُک پٹ پٹیا سواریں دو نپر ئے دست ءَ دیگ بوتگ۔ اے ڈوھ ءَ کنوکیں دو ناشرکارانے بت ءُ اَکس دور گِند آن ءَ زپت ءُ رکاٹ کرتگ۔ ھال سرکنوکان ءَ گوشتگ اے ناشرکار آن ءَ یک منزّمیں گروپ یئے وڑا وتی کارا گلائیش بوتگ اَنت۔ یکے چہ دزگیر بوتگیں مردمان ءَ جنیں آدم آن ءُ جنیں چُکّانی پریشان کنگ ءِ بدیں گوستی ھست اِنت.
گوشگ لوٹیت: رَسانک ءَ سربوتگیں ھال آنے رِد ءَ، اے ویل پہرہ ئے 12 بہمن ئے وانگجاہ ءِ نودربراں گوں پیش اَتکگ، سرجمی ءَ ھپت نپر اے پروندہ ئے تہا ھور بوتگ اَنت۔ بلے امنیتی ادارہ آنے زور ئے سوب ءَ ایوک ءَ یک ھاندانے آ، سرکار ءَ وتی شکایست کرتگ.
Be the first to comment