رَسانک نیوز/ جمے روچ 9 آبان ماہ 1404 ءَ، سوران ءِ کناری دمگ ءَ دھانے ءُ چاریزھی کٹھمدان آنے دو ھاندان ئے میان ءَ سلاھ کاری ءُ رازی نامہ بوتگ. اے دیوان پہ کُہنیں جیڑہ آنے سِندگ ءُ دوئیں نیمگ ءِ مردمانے میان ءَ براتی ءُ تُپاکی ئے آرگ ءَ گوں کماش ءُ اسپیت ریشیں مردمانی جُھد ءَ برجم دارگ بوتگ۔ دمگ ءَ اے دیوان تپاکی ءُ یک دلی ئے چیدگ زانگ بوتگ.
دیوان ءَ بہر زوروکیں کماشیں مردی ءَ گوشتگ: کبیلہ آنے میان ءَ سلاھ ءُ سکون ءِ آرگ ءَ ھاسیں ارزشتی ھست اِنت۔ مئی ورنائیں نسل پہ اہم ءُ زلوری کار آن ءَ باید اِنت چہ کماش ءُ اسپیت ریشیں مردمانی رھشونی ءَ سوب بہ براَنت۔ تپاکی ءُ ھمکاری ئے برجاہ دارگ چاریزھی ءُ دھانی ھاندان آن ءَ بید ماں سماج ءُ دمگ ءِ ایمن کنگ ءَ مزنیں کردے ھست اِنت.
اے سلاھ کاری ءِ دیوان ماں براتی چاگردے برجم دارگ بوتگ۔ اے دیوان ءَ بلوچانی پہ وتی کُہنیں دود ءُ رُبیدگ آنے زندگ دارگ ءِ واھشت ءُ جُھد ءَ درا کرتگ۔ اے دیوان توانت آں دگہ بلوچ کبیلہ آنے میان ءَ تپاکی ءُ براتی ءُ ایمنی ءَ مھکم تر بہ کنت.
Be the first to comment