رَسانک نیوز/ زی 10 آبان ماہ 1404 ءَ، دُزاپ ءَ گوں مزنی ئے درا کنگ ءُ کماش ءُ با بہروسہ ایں مردمانی جُھد ءَ نارویی ءُ شہبکش کبیلہ آنے میان ءَ سلاھ کاری ءُ رازی نامہ بوتگ۔ اے رازی نامے دیوان بلوچیا چہ پاھو دیگ ءَ رکّینتگ.
اے سلاھ کاری ءِ دیوان ءَ، «ابوبکر شہبکش»، کہ پہ کوش ءِ الزام ءَ پنچ سال بندیگ ءُ پاھو ئے ھکمی وارتگ گوں دیمیں مردمانی پہل کنگ ءَ چہ پاھو ءَ رکّتگ ءُ اے پیم ءَ وتی زندگی ءَ واترے کرتگ.
اے دیوان ءَ «چنگیزھان نارویی»، «الیرزا شہبکش»، ءُ کماش، اسپیت ریشیں مردمان ءُ دینی زانتکاران ءَ بہر زورتگ۔ اے دیوان پہ بلوچستان ءِ نندوکیں مردمان ءَ تُپاکی ءُ بَکش دیگ ءُ انسان دوستی ئے نمونگی جوڑ بوتگ.
اے انسان دوستیں گامگیج گوں دوئیں نیمگانے کماش ءُ اسپیت ریشیں مردمانی میانجی گری ءَ زورگ بوتگ ءُ دردناکین ءُ کُہنیں جیڑہ ای ءَ آسر کرتگ۔ اے دیوان ءَ بلوچانے تپاکی، سلاھ دوستی ءَ درا کرتگ ءُ پہ سماج ءَ چیدگی بوتگ.
Be the first to comment