رَسانک نیوز/ مروچی شمبے 10 آبان ماہ 1404 ءَ، پنچشمبے 8 آبان ماہ ءِ شپ ءَ دھپابید ءُ اسکلآباد ءِ میانجی ءَ سلاہ بندیں مردمانی مھمد شاھوزھی یکے چہ سپاہ ءِ جھمندیں کمانڈران ءُ چئیریں ادارہ ئے ڈلگیں کارندگ ئے گاڑی ءِ سرا اُرش ءُ تیرگواری ءَ ٹپیگ بوتگیں یک دگہ گاٹے ءَ چہ ٹپانے باز بوھگ ءَ ماں نادراہجاہ ءَ ساہ داتگ.
رَسانک ءَ ساہ داتگیں مردمئے پجّار «نسراللہ شاھوزھی»، دادھُدا ئے چُک زانتگ۔ زی 9 آبان ماہ ءَ اسمائیل شاھوزھی یکے دگہ چہ ٹپیگ بوتگیں مھمد شاھوزھی ئے گاٹ آن ءَ ساہ داتگ۔ رَسانک ءَ یکے دگہ چہ ٹپیگ بوتگیں گاٹ آنے پجّار ءَ «یاکوب شاھوزھی»، گوشتگ۔ چارمیں گاٹے پجّار داں انگت ءَ زانگ نہ بوتگ.
رَسانک ءِ ھال سرکنوکانے رِد ءَ، ھماں وھدا کہ مھمد شاھوزھی ئے گاڑی گوں سئے دگہ اسکورت کنوکیں گاڑی آنے کاروان ءَ روگ ءَ بوتگ، سلاہ بندیں مردمان ءَ چہ نزّیک ءَ اے کاروان ءِ سرا اُرش کرتگ۔ اے اُرش ءَ مھمد شاھوزھی ئے چار گاٹ ٹپیگ بوتگ ءُ نادراہجاہ ءَ سر کنگ بوتگ اَنت، بلے جِندی رکّتگ ءُ آئی ءِ گاڑی ءَ باز نُکس بوتگ.
داں انگت ءَ ھچ گل یاں کہ تنزیمی ءَ اے اُرش ءِ زمہ واری نہ منّتگ.
Be the first to comment