شستون ءَ نزامی ٹولی ءِ تَچکیں تیرگواری ءَ، بلوچی نہ روچ بستری بوھگ ءَ پد ساہ داتگ

رَسانک نیوز/ دوشمبے 5 آبان ماہ 1404 ءَ، بلوچے کہ نہ روچ دیمترا ماں تاریک 26 مہر ماہ، شستون ءَ آسپیچ ءِ راہ ءَ نزامی ٹولی ءِ تَچکیں تیرگواری ءَ سکّ ءَ ٹپیگ بوتگ ءُ پہ شرّتریں درمان ءَ تہران ئے نادراہجاہی ءَ سرکنگ بوتگ، چُنت روچ بستری بوھگ ءَ پد چہ بازیں ٹپّانے سوب ءَ ساہ داتگ.

اے بلوچے پجّار «ابداللہ شهنوازی (روشن‌زھی)»، 24 سالگ، ادریس ءِ چُک، بُندر ءَ واش ءِ نندوکیں مردمی زانگ بوتگ.

رَسانک ءِ ھال سرکنوکانے رِد ءَ، گوستگیں ھپتگئے شمبے ئے شپ ءَ نزامی ٹولی ءَ چہ نزّیک ءَ ابداللہ ءِ گاڑی ءِ سرا تیرگواری کرتگ۔ ابداللہ ءِ گاڑی ءَ دو اَوگان باشندگ نندوک بوتگ اَنت۔ اے تیرگواری ءَ ابداللہ ءَ تیر وارتگ ءُ سکّ ءَ ٹپیگ بوتگ۔ ھاندان ئے مردمان ءَ آئی ءِ ساہ ءِ رکّینگ ءَ، پہ درمان ءَ تہران ءِ نادراہجاہ ءَ سر کرتگ، بلے آیانی جُھد بے سوب بوتگ ءُ ابداللہ نہ روچ بستری بوھگ ءَ پد، ساہ داتگ.

گوشگ لوٹیت: اے تیرگواری ءَ اَوگان باشندگی ءَ ھم تیر وارتگ ءُ ٹپیگ بوتگ کہ داں انگت ءَ آئی ءِ ھالے سرپدئے نیست اِنت.