رَسانک نیوز/ شمبے روچ 26 مہر ماہ 1404 ءَ، گِہ ئے بُرزیں شگیم دمگ ءَ 23 سالگیں بلوچے جنیں آدمے شوّ ئے دست ءَ چہ دم ءِ بندگ ءَ کُشگ بوتگ۔ اے ویل پد چہ یک ھاندانے جیڑہ اے جن ءُ مرد ئے میان ءَ پیش اَتکگ.
اے ورنائیں جنیں آدمے پجّار «ریھانہ درزادہ»، 23 سالگ، ابدلرھمان ءِ چُک، دو گونڈیں جَنکّؤ ئے مات، بُندر ءَ گِہ ءِ شگیم دمگ ءِ نندوک زانگ بوتگ.
اے ھالے رِد ءَ، آئی ءِ شُو وت (ک۔د) پجّار ءَ رند چہ ھاندانے جیڑہ ءَ ؤ ریھانہ ءِ سُہران ءَ مرد ءَ دیگ ءِ گپّ ءَ نہ منّگ مرد ءَ آئی ءِ ساہ ئے دیم گپتگ ءُ کُشتگ۔ گوشگ بیت: ریھانہ ئے شوّ ءَ لوٹتگ دومیں آروس ءَ بہ کنت کہ جن اے گپّ ءِ ھلاپ بوتگ ءُ اے پیم آیانے میان ءَ جیڑہ رُستگ کہ گوں ریھانہ ءِ کُشگ بیئگ ءَ آسر بوتگ.
ھال سرکنوکان ءَ گوشتگ: ڈوھدار ءَ کوش ءَ رند، وتی چکّانی مات ءِ بے ساھیں جون ءَ واب ءِ کوٹی ءَ یلا کرتگ ءُ سُہب ءِ ساھت 4 ءَ، وتی ھاندان ءَ پہ اے نیمون ءَ کہ آئی ءِ جن بے ھوش اِنت وتی لوگ ءَ لوٹتگ۔ ھاندان ءِ رسگ ءُ دمگ ءِ نندوکیں مردمانی سہیگ بوھگ ءَ پد، کوش ئے ھال پولیس ءَ رپوٹ بوتگ ءُ پولیس ءَ شکّ ءِ بنیات ءَ شوّ ءَ پہ گیشتریں جُست ءُ پُرس ءَ داشتگ.
ریھانہ درزادہ ءِ بے ساھیں جون روچی ءَ پد، چھبار ءِ کانونی ڈاکٹر آن ءَ دیگ بوتگ۔ سرکاری رپوٹ ءَ دوشمبے 28 مہر ماہ ءَ آئی ءِ مرک ءِ سوب ساہ ءِ دیم ءِ دارگ گوشتگ۔ آئی ءِ چُکّانی پت دزگیر بوتگ.
Be the first to comment