رَسانک نیوز/ 29 مہر ماہ 1404 ءَ، پہرہ ءُ ابتر ءِ راہ ءَ نزامی ٹولی گاڑی یے پدا کپتگ کہ گوں گاڑی ءِ لیٹ ورگ ءَ آسر بوتگ ءُ گاڑی ءَ نندوکیں دوئیں بلوچ کُشگ ءُ ٹپیگ بوتگ اَنت۔ ٹپیگ بوتگیں مرد نادراہجاہ ءَ سرکنگ ءَ پد، نزامی ٹولی ءَ دزگیر کرتگ.
کُشگ بوتگیں بلوچے پجّار «رھمت مھمودزھی»، 37 سالگ، تاجمھمد ءِ چُک، آروس کرتگ ءُ چار زھگے پت، ٹپیگ ءُ دزگیر بوتگیں مرد کہ گوں رھمت ءَ گوہار زاتکی یے رشتئے بوتگ «سلتان آدوزھی (مھمودزھی)»، ھر دو بُندر ءَ پہرہ ءِ ابتر دمگ ءِ نندوکیں مردم زانگ بوتگ اَنت.
رَسانک ءِ ھال سرکنوکانے رِد ءَ، اے دو بلوچ پہرہ ءُ ابتر ئے راہ ءَ گوں وتی گاڑی ءَ روگ ءَ بوتگ اَنت، نزامی باسک ءِ مواد ءِ دیم داروکیں ٹولی ءَ گوں زاتی گاڑی ءَ آیانے پدا کپتگ ءُ یک پیچی ئے سرا گاڑی چہ کنٹرول ءَ در اَتکگ ءُ لیٹ وارتگ.
ھال سرکنوکان ءَ گوشتگ: نزامی ٹولی ءَ ڈنّ چہ کانون ءَ اے کاروایی کرتگ، چہ گاڑی ءِ لیٹ ورگ ءَ رھمت ءَ ساہ داتگ ءُ آئی ءِ ھمراہ ٹپیگ بوتگ کہ نادراہجاہ ءَ سر بوھگ ءَ پد نزامی ٹولی آئی ءَ دزگیر کرتگ.
Be the first to comment