رَسانک نیوز/ یکشمبے 27 مہر ماہ 1404 ءَ، پہرہ ءَ ملا کمال سلاھزھی یکی چہ امن دوستیں، با بہروسہ ایں، سماجی جُھد کار ءُ با اسریں بلوچاں کہ کبیلہ آنے میان ءَ پہ سلاھکاری ءُ رازی نامے کنگ ءَ مزنیں کردی بوتگ، چہ سلاہ بندین ءُ بے پجّاریں مردمانے تیرگواری ءَ کُشگ بوتگ.
رَسانک ءِ ھال سرکنوکانے رِد ءَ، مروچی سُہب ءَ پہرہ ءِ آجری (پاکیں اُوشت) ءِ میدان ءَ ھماں وھدا کہ ملا کمال وتے زاتی گاڑی ءَ گوں ڈریور ءُ وتی بچک ءَ سوار بوتگ۔ سلاہ بندیں مردمان ءَ آئی ءِ سرا تیرگواری کرتگ، ملا کمال ءَ جاہ ءَ ساہ داتگ، آئی ءِ بچک ٹپیگ بوتگ ءُ آں دگہ ھمراہ رکّتگ.
ملا کمال سلاھزھی بُندر ءَ سرباز ءِ گورناگ دمگ ءِ نندوکیں مردمی بوتگ۔ ایرانی سال تاک ءِ 60 ءُ 70 ءِ دھے آن ءَ، آئی یکے چہ ایران ءِ سرکارے ھلاپیں مردماں زانگ بوتگ، ھکومت ءِ امنیتی ٹولی ءَ گوستگیں سال آں پہ آئی ءِ سر ءِ گار کنگ ءَ باز جُھد کرتگ.
ماں 12 آبان 1378 ءَ، جمہوری اسلامی ئے نزامی ٹولی آن ءَ گوں مزنیں کاروائی ءَ گورناگ دمگ ءِ سرا اُرش کرتگ تاں کہ ملا کمال ءَ دزگیر بہ کننت۔ بلے نزامی باسک ءِ اے کاروایی گوں ملا کمال ءِ اُوشت ءُ ٹکّر ئے زورگ ءَ سوبین نہ بوتگ۔ اے کاروایی ءَ دہ آں نپر چہ امنیتی ٹولی ءَ کُشگ ءُ ٹپیگ بوتگ، سرکار ءَ اے کاروایی ءَ سوبیں نہ بوھگ ءَ پد، گوں نزامے بالگراب آن ءَ گورناگ دمگ ءَ بمب ریچ کرتگ، بمبانے تراک ءِ نشان انگت ءَ ایئر اَنت ءُ تباہ بوتگیں لوگ ءُ ماڑی انگت ءَ ھماں وڑا ویران اَنت ءُ ماڑی آں پدا جوڑشت نہ بوتگ اَنت.
ملا کمال سلاھزھی نزّیکیں سال آن ءَ پہ بلوچستان ءِ ایمن کنگ ءَ جُھد کرتگ ءُ کبیلہ آنے میان ءَ مدام سلاھکاری ءُ رازی نامہ اے کرتگ۔ آئی گوں سرکارے ھلاپ بوھگے گوست ءَ گوں، پدا ھم پہ بلوچانے جیڑہ آنے سِندگ ءَ جُھد کرتگ۔ ملا کمال ءَ پہ بلوچستان ءِ دمگ آنے ایمنی ءَ وتی کِرد شرّی ءِ سرا داتگ۔ گوستگیں سال آن ءَ ایرانے سرکار ءِ پہ ملا کمال ءِ کُشگ ءَ بازیں جُھد ئے سوب ءَ اے تَچکی ءَ لہتیں چہ مھلوک ءُ جاورانی چاروک آں آئی ءِ کوش ئے زمہ وار سرکار ءِ امنیتی ادارہ آں زاننت.
Be the first to comment