رَسانک نیوز/ شمبے روچ 19 مہر ماہ 1404 ءَ، واش ءِ کاسم آباد دمگ ءَ بلوچے ورنائیں جنیں آدمے پد چہ وسرک ءِ گون ءَ دپّ جنگی ءَ گوں شکاری سلاہ ءِ تیرگواری ءَ کُشگ بوتگ۔ ھمیں ھال آنے تَچکی ءَ کُشوک چُنت ساھت پد چہ دزگیر بوھگ ءَ بید چہ مرتگیں جنینے لوگے مردمانی رزایت ءَ آجو کنگ بوتگ۔ اے بُن گپّ ءَ کُشگ بوتگیں جنیں آدمے ھاندان ءُ لوگے مردم زھرکِن کرتگ ءُ آیاں سکّ ءَ پریشاں اَنت۔ ھمیں وڑا اے پروندہ ئے دیمروی ءِ درگت ءَ بازیں جُستی چِست کرتگ.
رَسانک ءَ اے جنیں آدمے پجّار (ساجدہ سندکزھی) بھزاد ءِ چُک، دو گونڈیں چُک ءِ مات، بُندر ءَ سوران ئے نندوک ءُ انّیگیں وھدا واش ءِ جھمنند زانتگ.
ھال زانتان ءَ گوں رَسانک ءَ گوشتگ: ساجدہ ءُ آئی ءِ وسرک ءِ میان ءَ دپّ جنگی کسانیں ھبری گاز ءِ کپسول ءِ رگلاتور ئے سرا چِست بوتگ۔ گُڑسرا ساجدہ ءِ وسرک ءَ گوں شکاری سلاہ ءَ آئی ءِ سرا تیرگواری کرتگ ءُ آئی ءَ جاہ ءَ ساہ داتگ.
ھال سرکنوکان ءَ گوشتگ: ساجدہ ئے ھاندان ءَ وسرک ءِ شکایست کرتگ ءُ نزامی ٹولی ءَ آئی ءِ وسرک ءَ دزگیر کرتگ بلے چُنت ساھت ءَ پد، بید چہ شکایست کنوکانے ھال دیگ ءُ رزایت ءَ آجو کنگ بوتگ.
گوشگ لوٹیت: جنوکیں مردے زوت ءَ آجو کنگ نزامی ءُ اِنساپ ءِ ادارہ آنے با اسریں پدگیری ئے نہ کنگ ءَ، وت نا اِنساپے ئے زندگیں مسالے اِنت ھمیں سوب ءَ بلوچستان ءَ نندوکیں مردمانی بہروسہ سرکار ئے سرا کم بوھگ ءَ اِنت. اے نا اِنساپی تمامیں زوراکی ءُ ھاندانی کوش ءُ جنیں آدمانے سرا زوراکی ئے پروندہ آن ءَ جاہ کئیت.
Be the first to comment