پہرہ ءِ چیریں ادارہ ءَ بلوچے سماجی جُھدکاری ءَ آوار جتگ

رَسانک نیوز/ سئے شمبے 15 مہر ماہ 1404 ءَ، پہرہ ءِ چیریں ادارے سادہ پوشیں ٹولی ءَ بلوچے سماجی جُھد کاری ءَ چہ بانک ئے تہا کار ءِ سرا دزگیر کرتگ ءُ پیسرا آئی ءِ لوگا شُتگ اَنت ءُ بید چہ سرکارے ھکم ءُ آڈر ءَ لوگ ءَ تہا بوتگ اَنت۔ زاتی ءُ لوگے سامان آن ءَ پٹ ءُ لوٹش کرتگ، لوگے مردمانے موبایل آں زپت اِش کرتگ ءُ گوں دزگیر کرتگیں مرد ءَ، ھور پہرہ ءِ چیریں ادارہ ءَ برتگ.

اے سماجی جُھدکارے پجّار «سمد ریگی»، پہرہ ءِ نندوک کہ دیمترا ماں تاریک 16 بھمن 1400 ءَ، پہرہ ءِ ایمنی ئے جاور آنے سرا شرگداری ءُ نبشتانک ءِ شنگ کنگ ءِ ھاترا پیسرا دُزاپ ءِ آمیدگِس ءَ لوٹش کرتگ ءُ چہ اُداں دزگیرش کرتگ ءُ سئے سال بندیگ بوھگ ءِ ھکمش داتگ۔ آئی پاری چہ دزاپ ءِ بندیگجاہ ءَ آجو بوتگ.

رَسانک ءِ ھال سرکنوکانے رِد ءَ، گوستگیں روچاں سمد ءَ پہرہ ءَ لہتیں مردمانے گونڈیں چکانے گون ءَ دست دراجی ءُ بدیں سلوکے ھال پاشک کرتگ ءُ چہ سوبہ ءُ شہر ئے کانونے ڈاکٹر آنے اے پروندہ ءِ سرا کاروایی ئے نہ کنگ ءَ گوں شرگداری ءَ ایئر جتگ. زمہ واریں ادارہ آنے وتی زمہ واریانی پورا نہ کنگ ءُ الکاپیں پد کردے نہ دیگ ءَ بازیں ھاندانے گوں وتی چُکاں بوتگیں زلم آنے باراوا دپ داشتگ ءُ ھچ نہ گوشنت، ھمیں وڑا آئی ءَ چہ اِنساپ ءِ ادارہ ءَ لوٹتگ کہ اے پروندہ ءَ شرّی ءَ پٹ ءُ پول بہ کنت تاں کہ اے ڈوھ ئے توامیں چیریں کردگار درا بہ بنت.

داں اے وھدا «زھگانے گوں دست دراجی» ئے پروندہ ئے بابت ءَ گیشیں ھالے دست نہ کپتگ. اے جاور آں گوں داں انگت اے سماجی جھد کارے دزگیر کنگے سوب زانگ نہ بوتگ۔ آئی ءِ دزگیر کنگ ءَ شش ساھت ءَ پد داں اے وھدا گوں لوگے مردمان ءَ ھال ءُ اھوالے نہ کرتگ.

امنیتی ادارہ آں وتی زمہ واریانے سرا دلگوش بیئگ ءِ جاہ ءَ بلوچے سماجی جُھد کاران ءَ گوں بیہار دیگ، تُرسینگ، بندیگ کنگ ءَ لوٹنت آیانے لوٹ ءُ زھرشانے ئے دیم ءَ بہ دار اَنت.