راسک ءَ سپاہ ءِ چیریں ادارے ٹولی ءَ سئے بلوچے ورنا آوار جتگ، دو ورنا پہ دُزاپ ءَ شئور دیگ بوتگ

رَسانک نیوز/ پنچشمبے روچ ءَ 10 مہر ماہ 1404 ءَ، پیشن ءُ راسک ءِ راہ ءَ سئے بلوچے ورنا کہ پیشن ءِ نندوکیں مردم بوتگ اَنت، سرباز ءَ کیشکور ءِ تبلیگی مرکز ءِ روگ ءِ وھدا توتا ھایلوکس گاڑی یے گوں زاتی نمبر پلیٹ ءَ آیانی دیم داشتگ ءُ جُست ءُ پُرس ءَ پد دزگیر کرتگ۔ آیانی میان ءَ ورنایی چُنت ساھت پد چہ دزگیری ءَ آجو بوتگ، بلے آں دگہ دو بلوچے ورنا پہ دُزاپ ءِ سپاہ ئے چیریں ادارہ ءَ شئور دیگ بوتگ اَنت۔ ھاندان ءُ لوگے مردمان ءَ دزگیر بوتگیں ورنایانے ھالے سرپدئے نیست اِنت ءُ نہ آیانی دارگ جاھے پکّائیں ھالے رستگ.

دزگیر بوتگیں ورنایانے پجّار «مُرتزا بیجاد»، 16 سالگ، اِنایت اللہ ئے چُک، «مبین نیکجو»، 17 سالگ، نورمھمد ءِ چُک، «ابوبکر بیجاد»، 18 سالگ، ملک ءِ چُک ھر سئے راسک ءِ پیشن ءَ نندوک بوتگ اَنت.

اے ھالے رِد ءَ، دزگیر بوتگیں ورنایانے ھاندان ءُ لوگے مردمان ءَ اِنساپ ءُ امنیتی ادارہ آنے بازیں تر ءُ تاب کنگ ءَ پد ھمیں ھال کہ دوئیں ورنا پہ دُزاپ ءَ شئور دیگ بوتگ اَنت دست کپتگ، اے ورنایانی پکّائیں ھالے سر نہ بوھگ، نہ دارگ ءِ جاگہ ئے ھالیئے دست کپگ ءَ، اے ورنایانی ھاندان ءُ لوگے مردم سکّ ءَ دل پریشاں کرتگ.