بزمان ءُ پہرہ ءِ راہ ءَ، چہ گاڑی ئے لیٹ ورگ ءَ دو بلوچے ٹیلکشّ کُشگ ءُ ٹپیگ بوتگ

رَسانک نیوز/ جمے 11 مہر ماہ 1404 ءَ، بزمان ءُ پہرہ ءِ راہ ءَ نیسان ءِ باری گاڑی ءِ ٹایر ے ترکّگ ءَ پد، چہ ٹیل ءَ بار جتگیں گاڑی ءَ لیٹ وارتگ، اے ویل ءَ بلوچے ٹیلکشّے ساہ داتگ ءُ آئی ءِ ھمراہ سکّ ءَ ٹپیگ بوتگ.

ساہ داتگیں بلوچے ٹیلکشّے پجّار «مھمد بمپوری»، 23 سالگ، ایوب ءِ چُک۔ ٹپیگ بوتگیں بلوچے ٹیلکشّے پجّار «اِرپان (یھیا) اسمائیل زھی»، دادمھمد ءِ چُک، بُندر ءَ بمپور ئے نندوکیں مردم زانگ بوتگ اَنت.

زمہ وارانے بلوچانے مالی ءُ ماشی جنجال آنے ٹاھینگ ءَ دلگوش نہ بیئگ ءُ ھمیں پیم الکاپیں کارے موہ ءِ نہ دیگ، بلوچ ورنایاں چہ ناچاری ءَ پہ ٹیلے کَشّگ ءَ شور داتگ۔ بلوچستان ءَ ٹیلے کشّگ وت ءَ گچین کرتگیں کارے نہ اِنت بلکیں مالے ءُ ماشے سہولیات ءِ نہ بوھگ، پہ زور سرا داتگیں تنگدستی ءُ ناچارے ءَ بلوچ ورنایاں پہ ٹیلے کشّگ ءَ مجبور کرتگ۔ ٹیلکشّگ ئے پُر ھتریں کار ءُ راہ آنے ایمنی ءِ نہ بوھگ ءَ ھر روچ دہ آں بلوچ ورنا ئے ساہ ءَ گِر اَنت.