کرمان ءَ گاڑی ئے لیٹ ورگ ءَ بلوچے ٹیلکشّے ساہ داتگ

رَسانک نیوز/ سئے شمبے روچ ءَ 8 مہر ماہ 1404 ءَ، بلوچے ٹیلکشّے کہ آئی ءِ پجّار «ابدلواھد دھمردہ»، ابدلوپا ئے چُک، 20 سالگ ءُ یزد ءِ جھمنند گوشگ بوتگ، ربات کرمان ءِ نزّیک ءَ چہ پژو 405 گاڑی ئے لیٹ ورگ ءُ در گِرَگ ءَ ساہ داتگ.

ابدلواھد وتے ھاندانے ایوکیں مردیں چُک بوتگ۔ سالے پیسرا پد چہ ایشی ءَ کہ آئی ءِ پت ابدلوپا دھمردہ گاڑی ئے ویل ءَ ساہ داتگ، ابدلواھد ءَ لوگے (مات ءُ پنچ کساں سالیں گوہار آنے) مالے ءُ ماشے زمہ واریاں سمبالتگ، گوں ابدلواھد ءِ مرک ءَ، اے ھاندان ءَ وتی دومئیں نان آروک ءَ ھم چہ دست ءَ داتگ۔ اے ھاندانے ھالات باز گمیگ اِنت ءُ آیاں بے سہارہ اَنت.

ٹیلکشّ آنے مدام کُشوکیں ویل آنے دپ ءَ کپگ ءَ مالی ءُ ماشی جنجال آنے زور ءُ سکّے آن ءَ بلوچانے سرا درا کنت۔ سرکار ءَ ھم پہ ورنا آنے پکّائیں روزگارے ءَ جُھد نہ کرتگ۔ اے جاور آنے سوب ءَ بازیں ھاندانے ءَ وتی زھگ ءُ ورنا اے کُشوکیں چکّرا چہ دست داتگ.