رپسنجان ءَ دُزّانی اُرش ءَ بلوچے کارگری کُشگ بوتگ

رَسانک نیوز/ جمے 4 شہریور ماہ 1404 ءَ، بلوچے کہ پہ کارگری ءَ سوبے کرمانے رپسنجان ءِ شہر ءَ شُتگ، دُزّان ءَ آئی ءِ ڈیرہ ئے سرا اُرش ءَ گوں بلوچے کارگر ءَ کارچ اِش کرتگ۔ آئی ءَ دل ءَ کارچ لگتگ ءُ ساہ داتگ.

اے بلوچے کارگرئے پجّار «ابوبکر گرگیج»، 19 سالگ، نادر ئے چُک زانگ بوتگ ءُ بُندر ءَ زھک ءِ کُہنیں کلاتے دمگ ءَ نندوک بوتگ.

اے ھالے رِد ءَ، بلوچستان ءَ الکاپیں کارے نہ بوھگ ءَ آئی ناچار بوتگ پہ کارگری ءَ سوبے کرمان ءِ رپسنجان ئے شہر ءَ بہ روت ءُ پستئے باگ ءَ کارگری بہ کنت ءُ ھم نگہپان بہ بیت۔ ابوبکر پہ کارگری ءَ چیزے وھد رپسنجان ءَ شُتگ ءُ اُدے پستئے باگاں کارگری کرتگ ءُ نگہپانی داتگ۔ شپ ءَ دُزّان ءَ آئی ءِ ڈیرہ ئے سر اُرش کرتگ ءُ کارچ اِش جتگ ءُ کارچ ماں آئی ءِ دل ءَ لگتگ.

بلوچستان ءَ پکّائیں کارے نیست اِنت ءُ نہ ھکومت پہ کارے موہ دیگ ءُ بستارے جوڑ کنگ ءَ پہ دل اِنت۔ اے گپّ وتی جاگہ ءَ، بلوچستان ءَ اَھدی کارے کنگ یا چُش کہ ٹیلےکشّگ ءَ کہ بلوچانے روایتے کار زانگ بیت سرکار ءَ اے وڑیں کارانے دیم پہ کاچاک ءِ نیمون ءَ داشتگ۔ سرکار ءَ گوں سیمسر آنے بندگ ءَ پہ زانت ءَ بلوچ بزّگ ءُ ھیراں کرتگ۔ اے جاور آنے سوب ءَ بازیں بلوچے ورنایی ناچار اَنت پہ لاپ ئے شوہاز ءَ اے دگہ سوبہ آں جلا وتن بہ بنت۔ در آں ڈیہ ئے روگ ءَ گیشتریں زوراکی سگگ لوٹیت ءُ زندمانے آسر کنگ ثھد تر بیت.