رَسانک نیوز/ دوشمبے روچ ءَ 24 شہریور ماہ 1404 ءَ، جیرُپت ءِ بندیگجاہ ءَ بلوچے بندیگے کہ نزامی ٹولی ءَ پہ کوش ءِ الزام ءَ دزگیر کرتگ ءُ آئی ءَ پاھو ئے ھُکم وارتگ، پاھو دیگ بوتگ.
اے بلوچے پجّار «امیرھسین ھمتی»، 30 سالگ، لُنڈ، ھسن ءِ چُک، (سابکی ءُ پلنگی) کُٹھمدان، بُندر ءَ امبرآباد ءِ جھادآباد دمگ ءِ مردمے زانگ بوتگ.
رَسانک ءِ ھال سرکنوکانے رِد ءَ، امیر ھسین سال 1401 ءَ ھوریں اَڑ ءُ جیڑے ءَ پد، پہ کوش ءِ الزام ءَ دزگیر کنگ بوتگ ءُ گوں پروندہ ئے دیمروی ءَ آئی ءَ پاھو ئے ھُکم وارتگ۔ اے در ءُ دوراں آئی ءِ ھاندان ءُ لوگے مردمان ءَ جُھد کرتگ گوں دیمیں مردماں رازی نامہ بہ کن اَنت، بلے سوبیں نہ بوتگ۔ شمبے روچ ءَ 22 شہریور ماہ ءَ جیرُپت ءِ بندیگجاہ ءِ مستر ءُ زمہ واران ءَ آئی ءِ لوگ ءَ ھال داتگ ءُ آیان ءَ پہ گُڑ سریں دیدار ءَ لوٹتگ، اے پیم ءَ آئی ءَ گوں وتی لوگے مردمان ءَ گُڑسریں دیدار کرتگ.
Be the first to comment