رَسانک نیوز/ مروچی شمبے 29 شہریور ماہ 1404 ءَ، شستونے زنگیان دمگ ءَ بلوچے کہ تاریک 8 مرداد ماہ ءَ سلاہ بندین ءُ بے پجّاریں مردمان ءَ آوار جتگ 52 روچ ءَ پد آئی ءِ ھالے سرپدئے نیست اِنت۔ لوگے مردم گوں امنیتی ادارہ آنے بے پرواھی ءَ پہ آئی ءِ ھالے دس کپگ ءَ سکّ ءَ دل پریشان اَنت.
اے بلوچے پجّار «منسور ملکزادہ»، 27 سالگ، ابدلستار ئے چُک، بُندر ءَ شستونے زنگیان دمگے نندوک زانگ بوتگ.
رَسانک ئے ھال سرکنوکانے رِد ءَ، ویلے روچ ءَ ھماں وھدا منسور وتی زاتی دکان ءَ کارا بوتگ سلاہ بندین ءُ بے پجّاریں مردمان ءَ آئی آوار جتگ ءُ اُدے دور گند ءُ بت آنے زپت کنوکیں سسٹم گوں وت بُرتگ اَنت۔ اے ویل ءَ پنجاہ روچ گوستگ بلے آئی ءِ نہ ھالے سرپدئے دس کپتگ ءُ نہ آئی ءِ دارگ ئے جاگہ زانگ بوتگ.
ھال سرکنوکان ءَ گوشتگ: آئی ءِ بیگواہ بوھگ ءِ ھال امنیتی ءُ نزامے ادارہ آن ءَ سر کنگ بوتگ، بلے آیان ءَ ھچ پیمیں گامگیجی نہ زُرتگ.
اے ورنائے لوگے مردمان ءَ چہ زمہ واریں ادارہ آن ءَ لوٹتگ پہ آئی ءِ ھالے سرپدئے ءُ پروندہ ئے دیمروی ءَ جُھد بہ کن اَنت.
Be the first to comment