میرجاوہ ئے ریک ملک دمگ ءِ نودربران ءَ روتک ءِ سیمسرانے پدا پچ کنگ ءِ لوٹ کرتگ

رَسانک نیوز/ یکشمبے 23 شہریور ماہ 1404 ءَ، میرجاوہ ئے ریک ملک دمگے نودربران ءَ روتک ءِ سیمسراں بندگ ءُ دمگ ءِ نندوکیں مردمانے اُستانداری ءُ سپاہ ءِ پاسدارانے باڈر ے درگت ءَ پئیسَلہ ئے پد کرد ءَ، سیمسراں پدا پچ کنگ ءِ لوٹ کرتگ۔ نودربران ءَ اُستاندار ءَ گُشتانک ءَ گوں زور داتگ: مئے پت ءُ برات باید اِنت کہ اے مرز ءَ کار بہ کن اَنت.

نودربراں گوشنت: چہ سیمسرانے بندگ ءُ آیانی ھاندان آنے بیکار بوھگ ءَ آیاں وانگے نوکیں سالے زَلورت ءُ لوٹانے (کِیپ، دپتر، کَوش) پیلو کنگ ءَ بے وس اَنت۔ اے جاور ءَ ھاندان آنے دل پریشانے گیش کرتگ.

سیمسرانے بند کنگ اُدے نندوکیں مردمانے پَشت کاپینگ ءُ آیانی مالے جنجال آں گیش کنگ ءَ گوں آیانی زھگانے وانگ ھم، گون جتگ ءُ ھراب کرتگ۔ مستر آنے بے پرواھی ءَ ریک ملک دمگ ءِ نندوکیں مردمانے سرا زور ءُ پریشانے دو چُنت کرتگ. پیسرگیں روچان ءَ میرجاوہ ئے ریک ملک دمگے نندوکان ءَ روتک ءِ سیمسراں پدا پچ نہ کنگ ءُ سپاہ ئے تانکری سیاست ءِ ھلاپ مُچ بوتگ اَنت ءُ زھرشانے کرتگ۔ زھرشانے کنوکان ءَ گوشتگ: داں کہ روتک ئے سیمسراں پیشگیں وڑا پدا پچ مہ بنت سپاہ ئے تانکری سیاست ءِ ٹیل سرکنگ ئے دیم ءَ دار اَنت۔ سپاہ ءِ تانکری سیاست ءِ رھبندا ٹیل ئے بہا کنگے نپ ءُ سیت سپاہ ءُ آئی ءِ دمگ ءَ نندوکیں سردار ءُ ایئر دستانے کیسّگ ءَ رو اَنت، زھر شانوکیں مردمان ءَ بیہار داتگ داں کہ سیمسراں نندوکیں مردمانے لوٹ منّگ مہ بنت راہ ءُ ڈکّ آں پچ نہ کن اَنت.

زھرشانوکیں مردمان ءَ گوشتگ: سپاہ ءُ سرکارے سوب چہ تانکری سیاست ءَ ایشنت کہ ٹیلکشّگ ئے کارے مزنیں بہری ءَ امنیتی ادارہ آنے کارندگان ءَ بہ دنت۔ گوں اے ناشریں سیاست ئے کارمرز بوھگ ءَ سپاہ ءُ امنیتی ادارہ آنے کارندگاں ٹیل ءَ پہ ارزاں بہا ءَ زور اَنت ءُ پہ گیشتریں کیمت ءَ سودا جننت۔ دمگ ءَ نندوکیں مردم ءُ کبیلہ آن ءَ مدام گوشتگ: تانکری سیاست ئے کارمرز کنگ ءَ، دمگ ءَ نندوکیں چل داں پنجاہ ھزار مردم بیکار ءُ بے روزگار بہ اَنت۔ اَلّم اِنت کہ مردم سپاہ ءِ دیم ءَ اُوشت اَنت ءُ آئی ءِ تانکری سیاست ءَ سوبیں بوھگ ءَ نہ ھِلّنت.