واش ءَ ماھے دیمترا بیگواہ بوتگیں بلوچے چُکے داں انگت ءَ لوگے مردماں آئی ءِ ھالے سرپدئے دست نہ کپتگ

رَسانک نیوز/ جمے روچ 21 شہریور ماہ 1404 ءَ، واش ءَ چہ پشتکوہ ئے چارراہ ءَ ماھے دیمترا بیگواہ بوتگیں بلوچے چُکے داں انگت آئی ءِ ھالے سرپدئے دست نہ کپتگ۔ اے گونڈیں بلوچے چُکے پجّار «مھمد تاجیک»، میرویس ئے چُک ءُ امان ڈیم کشّ ئے نُماسگ گوشگ بوتگ۔ تاریک 24 مرداد ماہ ءَ مھمد پہ جمے نمازے وانگ ءَ مسیت ءَ شُتگ ءُ داں انگت ءَ لوگ ءَ واتر نہ بوتگ، نہ کہ آئی ءِ ھالے سرپدئے دست کپتگ۔ اے پیم لوگے مردمانے دل پریشانے روچ پہ روچ گیشتر بوھگ اِنت.

مھمد ئے سیادان ءَ گوشتگ: مھمد وتی پیروک ئے لوگ ءَ نندوک بوتگ۔ جمے نماز ئے وانگ ءَ مسیت ءَ شُتگ ءُ داں انگت لوگ ءَ واتر نہ بوتگ۔ آئی ءِ ھاندان ءَ پہ ھالے سرپدئے دست کپگ ءَ سرکارے ادارہ آں تر ءُ تاب کرتگ۔ چہ ڈنّ ملکے باشندگانے کیمپ ءَ بہ گر داں کہ نادراہجاہ آن ءُ اے ویل ءَ گوں جوڑتگیں ادارہ آں شُتگ اَنت، بلے ھچ یکے ءَ پہ مھمد ئے شوہاز ءَ کاروایی نہ کرتگ۔ مھمد ئے لوگے مردمان ءَ چہ مھلوک ءُ جھمنندان ءَ لوٹتگ ھر کس ءَ اے ویلے درگت ءَ ھالے رست، ھالاں اے نمبراں سر بہ کنت:
0903 452 1520
0993 479 4920

اے ویل ئے سرا زمہ وارانے دلگوش نہ کنگ ءَ لوگے مردمانے دل پریشانے ءُ زھنی وزواس گیش کرتگ۔ اے ویل ءَ سرکارے کمزوریان ءُ ناکامیان ءَ اے وڑین پروندہ آنے دیم ءَ درا کرتگ.