رَسانک نیوز/ جمے 21 شہریور ماہ 1404 ءِ شپ ءَ، میرجاوہ ئے سیمسراں ریک ملک دمگے بازیں نندوکیں مردمے ءَ پہ سرکار ءُ سپاہ ءِ سیمسراں بندگ ءُ اُدے نندوکیں مردماں بیکار کنگ ءَ زھرشانے کرتگ، دمگ ءِ نندوکیں مردمان ءَ راہ ءُ ڈکّ بستگ اَنت ءُ ٹایر مان داشتگ۔ اے زھرشانے سپاہ ءُ اُستانداری ئے سیمسرانے درگت ءَ ناشریں سیاست ئے ھلاپ کنگ بوتگ.
زھرشانے ءَ ھُوریں جھمنندے ءَ زمہ واراں بیہار داتگ ءُ گوشتگ: اگاں زمہ وار ءُ مستر آں سیمسراں پچ مہ کن اَنت، گُڑا ما ھم بے توار نہ نندیں۔ اگاں آیاں اے دمگانے ایمنی ءَ لوٹ اَنت گُڑا پہ سیمسراں نندوکیں مردماں کار ءُ روزگارے پِگر ءَ بہ کن اَنت۔ آیان ءَ مئے دمگانے آپ دگہ جاگہ آں داتگ۔ کِشت ءُ کِشار چہ مئے دست ءَ شُتگ ءُ دگہ کارے پَشت نہ کپتگ.
زی سُہب ءَ ھم ھمیں دمگانے بازیں نندوکیں مردمے ءَ پہ روتک ئے سیمسراں دوبارگ پچ نہ کنگ ءُ ھمیں وڑءَ سپاہ ئے ٹانکری سیاست ءِ ھلاپ ءَ زھرشانے کرتگ۔ آیان ءَ گوشتگ: داں سیمسراں پیسرگیں وڑا پَچ کنگ مہ بنت سپاہ ءُ دمگ ءِ با اثریں مردماں ھم چہ ٹانکری سیاست ءَ سوب نہ کن اَنت۔ آیانے ٹیلے سر کنگے راہ بندگ ءُ دارگ بنت. زھرشانے کنوکیں مردمان ءَ گوشتگ: داں سرکار مئے لوٹ ءَ مہ منّیت، ڈکّ ءُ راہ آں پَچ نہ کن اَنت.
پیشگیں روچان ءَ سپاہ ءُ لہتیں چہ بلوچے سروک ءُ اسپیت ریشیں مردمان ءَ گوشتگ: شمبے روچ ءَ 22 شہریور ماہ ءَ روتک ئے سیمسراں دوبارگ پچ کنگ بنت۔ بلے چیزے وھدا پد زانگ بوتگ کہ روتک ئے سیمسراں تہنا پہ ھماں ٹیلکشّ آں پچ کنگ بیت کہ پہ سپاہ ئے ٹانکری سیاست ءَ ٹیل سر بہ کن اَنت.
دیمترا یکشمبے روچ ءَ 16 شہریور ماہ 1404 ءَ، پد چہ ایشی ءَ کہ دمگے نندوکیں مردمانے پُر امنیں زھرشانے سوبیں نہ بوتگ، بے پجّاریں مردمان ءَ سپاہ ءِ سیمسراں ایئر کرتگیں ٹانک آس جتگ ءُ بُن داتگ۔ سپاہ ئے ٹانکری سیاستے ٹانک ئے امبار باڈرے دیوار ءُ امنیتی کیمپ ئے نزّیک ءَ ایئر کنگ بوتگ اَنت۔ بازیں ٹانکے سوھتگ ءُ بازینے دگہ ٹُنگ بوتگ.
زھرشانے کنوکیں مردمان ءَ گوشتگ: سپاہ لوٹیت گوں ٹانکری سیاست ئے کارمرز کنگ ءَ ٹیل ئے بہا کنگ ءِ نپ ءُ سیتّ ءَ وت بہ زوریت ءُ چیزے وتی جھمنندیں چیئر دستان ءَ بہ دنت. دُرستیں کبیلہ ءُ مردمان ءَ گوشتگ: گوں ٹانکری سیاست ءِ کار مرز کنگ ءَ گُمان اِنت چل داں پنجاہ ھزار مردم بیکار بنت۔ گُڑا اَلمّ اِنت کہ اے مردم سپاہ ءِ ٹانکری سیاست ئے دیم ءَ اُوشت اَنت.
Be the first to comment