راسک ءَ امنیتی ٹولی دو بلوچ رہ پچیں بندیگ دزگیر کنگ ءَ پد، چھبار ءِ بندیگجاہ ءَ دیم داتگ

رَسانک نیوز/ 19 شہریور ماہ 1404 ءَ، دو بلوچے برات کہ وتی رہ پچی ئے کاگداں دسھت ءَ راسک ءَ شُتگ اَنت، امنیتی ٹولی آیان ءَ بید چہ سرکار ے ھُکم ءَ دزگیر کرتگ ءُ چھبار ءِ بندیگجاہ ءَ دیم داتگ.

اے دوئیں بلوچے برات آنے پجّار «ماجد آرامش»، 26 سالگ، «ھلیل آرامش»، 33 سالگ، دوئیں درمھمد ئے چُک ءُ سرباز ءَ دیمگان دمگ ءِ نندوک زانگ بوتگ.

رَسانک ءِ ھال سرکنوکان ءَ گوشتگ: اے دوئیں برات دیمترا پہ یک پروندہ ے سرا دزگیر بوتگ اَنت ءُ گوں پروندہ ے دیمروی ءَ کازی ءَ آیان ءَ بندیگ کنگ ئے ھُکم داتگ۔ چیزے وھدا پد، کازی ءَ پہ آیانی رہ پچیں بندیگے ءَ منّتگ.

ھال سرکنوکان ءَ گوشتگ: اے دوراں کہ دوئیں برات رہ پچیں بندیگ بوتگ اَنت، وھدے سرا وتی ھازری ئے دسھت ءِ کنگ ءَ راسک ءِ اِنساپ دیوکیں ادارہ ءَ شُتگ اَنت۔ بلے زی پد چہ راسک ءِ آھگ ءَ، امنیتی ٹولی آیان ءَ دزگیر کرتگ ءُ چھبار ءِ بندیگجاہ ءَ دیم داتگ. ھاندان ءَ رندگیری ءَ پد، زانتگ کہ آیانی چُک دزگیر بوتگ اَنت ءُ چھبار ءِ بندیگجاہ ءَ دیم دیگ بوتگ اَنت.

داں انگت، امنیتی ٹولی ءُ اِنساپ دیوکیں ادارہ ئے سوب چہ اے کار ئے کنگ ءَ زانگ نہ بوتگ.