رَسانک نیوز/ یکشمبے 16 شہریور ماہ 1404 ءِ بانگواہ ءَ، سوبے مازندران ءَ بابلسر ءِ بندیگجاہ ءَ بلوچے بندیگے ھماں وھدا پاھو دیگ بوتگ کہ چہ آئی ءِ پروندہ ئے دیمروی ءَ بہ گر داں کہ آئی ءِ سرا کوش ءِ بستگیں الزام گمان دار بوتگ اَنت ءُ گوں آئی ءِ دزگیر کنگ ءَ لوگے مردمان ءَ گوشتگ کہ مئی مردم بے گناہ اِنت.
اے بلوچے پجّار «شہریار (اھمد) دھواری ھاس»، ھاتم ئے چُک ءُ بُندر ءَ شستونے نندوکیں مردمے زانگ بوتگ.
رَسانک ءِ ھال سرکنوکان ءَ گوشتگ: شہریار سئے سال دیمترا انٹرنیٹ ءِ سرا گوں لہتیں ورنا ءَ سنگت بوتگ ءُ پہ سودائے گِرَگ ءَ گوں آیان ءَ وھدے ٹاھینتگ۔ شہریار ءِ سنگت آں گوں دچار کپگ ءَ پیسر، نزامی ٹولی ءَ دزگیر کرتگ۔ آئی ءِ سیاد ءُ نزّیکیں مردمان ءَ گوشتگ: یک روچی دیمتر چہ شہریار ئے سربوھگ ءَ، ھمیں شہر ءَ کوشے بوتگ۔ اے کوش ئے کنوک آئی ءِ سنگت آنے سنگت بوتگ اَنت. روچی پد چہ سنگت آن ءَ گوں دچار کپگ ءَ، نزامی ٹولی ءَ آئی ءَ پہ کوش ءِ ھور بوھگ ءِ الزام ءَ دزگیر کرتگ.
شہریار ءِ سیاداں گوشتگ: کوش ئے وھدا شہریار شستون ءُ بابلسر ءِ راہ ءَ بوتگ ءُ بس ئے بلیت ءُ تاریک اے گپّ ءِ راستی ءَ درا کن اَنت، بلے آمیدگِس ءَ اے گپّ ءِ سرا دلگوش نہ کرتگ. دومی گپّ ایشنت کہ شہریار ئے راستیں دست ءِ سئے لنکوک نہ سُرتگ اَنت ءُ ھُشک دار بوتگ اَنت، داں اِداں کہ آئی ءَ نہ توانتگ ڈریوری بہ کنت، منّگ ثهد اِنت کہ کوش ءَ شہریار ءَ کرتگ.
شہریار ءِ لوگے مردمان ءَ گوشتگ: چہ بے زرّی ءُ دست مہ رسی ءَ آیان ءَ نہ توانتگ شہریار ءِ پروندہ ءَ شرّیئے سرا رندگیری بہ کن اَنت۔ وکیل ءَ ھم کازیانے زور ئے دیم ءَ بے وس بوتگ ءُ چہ اے پروندہ ءَ دس کشّ اِتگ. شہریار ئے سیاد ءُ لوگے مردمان ءَ، پروندہ ئے دیمروی ءُ آئی ءَ پاھو ئے ھکم دیگ ءَ نا اِنساپے، ھکّ ءِ پادلپاش کنگ ءُ دروگ ءُ بے بنیادیں کسّہ اے زانتگ.
گوشگ لوٹیت: بابلسر ءِ اِنساپ دیوکیں ادارہ ءَ شہریار ئے لوگے مردم پہ گُڑسریں دیدار ءَ لوٹتگ ءُ اے پیم آیان ءَ گُڑسریں گندوک کرتگ، شہریار ءِ بے ساھیں جون زی سُہب ءِ ساھت دہ ءَ شستونے کُہنگیں کلات دمگ ءِ ھڈ ایئردہ ءَ، مانش ءَ ایئر دیگ بوتگ.
Be the first to comment