پہرہ ءَ سلاہ بندیں مردمان ءَ لوگ یئے سرا اُرش کرتگ ءُ لوگے واھُند کُشتگ

رَسانک نیوز/ چارشمبے روچ ءَ 12 شہریور ماہ 1404 ءَ، پہرہ ءَ سردرگان دمگے سئدی میدانے نزّیک ءَ سلاہ بندیں مردمان ءَ گوں تُپنگ ءُ کارچ ءَ، لوگ یئے سرا اُرش کرتگ، لوگے واھُند ءَ گوں آیاں ٹکّر زُورتگ۔ اُرش کنوکیں مردمان ءَ گوں تُپنگ ءُ کارچ ءَ آئی ءِ سرا وار کرتگ۔ ٹپّانے باز بوھگ ءَ لوگے واھُند ءَ جاہ ءَ ساہ داتگ.

کُشگ بوتگیں بلوچے پجّار «سئید نارویی (شیھکی)»، 29 سالگ، مھراب ءِ چُک، بُندر ءَ پہرہ ئے نندوکیں مردمے زانگ بوتگ.

ھال زانت آن ءَ گوشتگ: اُرش کنوکیں مردمان ءَ چہ لوگے بان ءَ لِک بوھگ ءَ پد، لوگ ءَ تہا بوتگ اَنت۔ سئید ءَ آیانی دیمے دارگ ءِ جُھد کرتگ ءُ ٹکّر زُورتگ۔ اے ٹکّر ءَ سلاہ بندیں مردمان ءَ سئید ءِ سرا تیرگواری ءَ ھور کارچ ھم کرتگ۔ گڑ سرا سئید چہ ٹپّانے باز بوھگ ءَ جاہ ءَ ساہ داتگ.

دمگ ءِ نندوکیں ھماں مردمان ءَ کہ اے ویل چمّ وت دیستگ، گوشتگش: اُرش کنوکاں چار مردم بوتگ اَنت ءُ سئید ءِ سرا تیرگواری ئے وھدا، آیانے وتی ھمراھی ءَ ھم چہ نازانتی ءَ تیر وارتگ ءُ ٹپیگ بوتگ۔ داں ھم آیاں چہ جاہ ءَ در روگ ءَ سوبیں بوتگ اَنت.

داں انگت ءَ نہ اُرش کنوکانے سوب چہ اے کارا زانگ بوتگ ءُ نہ کہ اے ویل ءِ پُژدر زانگ بوتگ.