رَسانک نیوز/ چارشمبے 12 شہریور ماہ 1404 ءَ، بلوچے کہ ھشت روچ دیمترا چہ شیراز ءَ پہ چھبار ءَ واتر کنگ ءَ گوں بیگواہ بوتگ داں انگت آئی ءِ ھالے سرپدئے نیست اِنت۔ اے گپّ ءَ آئی ءِ لوگے مردم ءُ سیاد سکّ دل پریشاں کرتگ. سیاد ءُ لوگے مردمان ءَ پہ آئی ءِ ھالے سرپدئے دست کپگ ءَ امنیتی ءُ نزامی ادارہ آں، نادراہجاہ آں، کانونے ڈاکٹر آنے آپیس آن ءَ باز تر ءُ تاب کرتگ بلے سوبین نہ بوتگ اَنت.
اے بلوچے پجّار «پاروک برھانی»، 16 سالگ، ابدلباست ئے چُک، بُندر ءَ سرباز ءِ مردم ءُ انّیگیں وھدا چھبار ءِ جھمنند ءُ یازدہمیں کلاس ءِ در برے زانگ بوتگ.
رَسانک ءِ ھال سرکنوکانے رِد ءَ، پاروک ءَ دوشمبے روچ ءَ 3 شہریور ماہ ءَ چہ شیراز ءَ پہ چھبار ءَ بلیت کرتگ ءُ سئے شمبے روچ ءَ 4 شہریور ماہ ءِ سُہب ءِ ساھت 6:30 ءَ چھبار ءَ سربوتگ. چھبار ءَ سربوھگ ءَ پد داں انگت لوگ ءَ واتر نہ بوتگ ءُ آئی ءِ موبایل بند اِنت.
ھال سرکنوکان ءَ گوشتگ: پاروک مرداد ماہ ءِ گُڑسریں روچاں پہ کار ءُ روزگار ءَ شیراز شُتگ، چہ شیراز ءَ واتر کنگ ءَ پد آئی ءِ ھالے سرپدئے نیست اِنت.
آئی ءِ لوگے مردمان ءَ چہ مھلوک ءَ لوٹتگ پاروک ے شوہاز ءَ آیانی کمک ءَ بہ کن اَنت، ھمیں پیم آیان ءَ چہ نزامی ءُ امنیتی ادارہ آن ءَ لوٹتگ پہ پاروک ے درگیجگ ءَ جُھد بہ کن اَنت.
Be the first to comment