زرباریں رودبار ءَ نزامی ٹولی ءِ تیرگواری ءَ بلوچے ٹیلکشے کُشگ بوتگ

رَسانک نیوز/ 9 شہریور ماہ 1404 ءَ، زرباریں رودبار ئے راہ ءَ نزامی ٹولی ءَ بلوچے ٹیلکشے گاڑی ئے سرا تیرگواری ءَ، گاڑی لیٹ وارتگ ءُ ڈریور ٹپیگ بوتگ۔ ٹپّانے باز بوھگ ءَ ڈریور ءَ ساہ داتگ. ھماں کہ اے ویل ءَ چمّ وت دیستگ، گوشتگش: نزامی ٹولی ءَ بے توار ءُ اُشت ئے دیگ ءَ ٹیلکشّیں گاڑی ئے سرا تیرگواری کرتگ. اے ویلانے پد ماں پد بوھگ ءُ مستر ءُ سروکانے پہ آیانی دیم دارگ ءَ گامگیج نہ کنگ ءِ سوب ءَ بلوچستان ءَ جانی نُکساں گیشتر بوھگ اَنت.

اے بلوچے ٹیلکشے پجّار «چنگیز جلالی ھوت»، 40 سالگ، نوروز ءِ چُک، آروس کرتگ ءُ دو زھگے پت، دلگانے چلکنار دمگے نندوک زانگ بوتگ.

اے ھالے رِد ءَ، نزامی ٹولی ءِ چنگیز ءِ گاڑی ئے سرا تَچکیں تیرگواری ءَ، گاڑی ءَ لیٹ وارتگ ءُ آئی ٹپیگ بوتگ۔ ٹپّانے باز بوھگ ءَ آئی ءَ ساہ داتگ. نزّیکیں سال آن ءَ، بلوچستان ءَ نزامی ٹولی ئے ٹیلکش آنے سرا بے رھبندیں تیرگواری ءَ، بازیں ٹیلکشے کُشگ ءُ ٹپیگ بوتگ. زمہ وارانی اے درگت ءَ بے پرواھی ءُ کسوروار آنے ھلاپ ءَ گامگیج نہ کنگ ءَ جاور ھماں پیم دیم ءَ روان اِنت.