سرباز ءَ ایراندوست ءُ ھُسین‌زھی کُٹھمدان آنے میان ءَ پد چہ یک سال اَڑ ءُ جیڑہ سلاھ کاری ءُ رازی نامہ بوتگ

رَسانک نیوز/ شمبے 8 شہریور ماہ 1404 ءَ، سرباز ءِ گویمرک دمگ ءَ ایراندوست ءُ ھُسین زھی کُٹھمدان آنے میان ءَ پد چہ یک سال اَڑ ءُ جیڑہ ءُ ٹکّر ءَ گوں سروک ءُ با بہروسہ ایں مردمانے میانجی گری ءَ سلاھ کاری ءُ رازی نامہ بوتگ. اے رازی نامہ ءُ سلاھ کاریے دیوانے برجم دارگ ءَ دوئیں کُٹھمدانے اسپیت ریش ءُ کماشیں مردمان ءَ ھور ورنایان ءَ ھم پہ رازی نامے بوھگ ءَ جُھد کرتگ. دیوانے گُڑ سرا دوئیں کبیلہ آنے مردمان ءَ کُہنیں کینگ ءُ دژمنی آں شَمُشتگ ءُ آیانی جاہ ءَ دوستی ءُ ایمنی ءَ زرتگ.

دیوان ءَ نندوکیں کماش ءُ اسپیت ریشیں مردمان ءَ دوئیں کُٹھمدان آنے میان ءَ اَڑ ءُ جیڑہ آنے ھلاس بوھگے جار جتگ ءُ نیمرانیں «ادھم ایراندوست»، ءَ پہ شَرّی ءَ یات کرتگ ءُ شرپ بکشتگ. دوئیں کبیلہ آنے مردمان ءَ منّتگ کہ چہ اِداں پد، گوں تپاکی ءُ دوستی ءَ پہ وتی دمگے دیمروی ءَ گام بہ زؤر اَنت ءُ پیسرگیں دژمنی آں موہ مہ دینت کہ آیانی میان ءَ براتی ءَ ھراب بہ کن اَنت.

اے گپّ ءِ گوشگ اداں لازم اِنت کہ جمے روچ ءَ 12 مرداد ماہ 1403 ءَ، «ادھم ایراندوست»، دلمراد ءِ چُک ءُ سرباز ءِ مینان دمگ ءَ نندوک بوتگ، سلاہ بندیں مردے ءَ پیسرا آئی ءَ کارچ کرتگ ءُ گُڑ سرا تیر جتگ ءُ کُشتگ. اے ویل دوئیں کبیلہ آنے میان ءَ اَڑ ءُ جیڑے بُندر زانگ بوتگ.

اے سلاھ کاری ءُ رازی نامے دیوان باید اِنت پہ دگہ کُٹھمدان آن ءَ مسالے ءُ ھمیں پیم ءَ پہ آوکیں نسل ءَ راہ ے چراگے بہ بیت ءُ آیاں جنگ ءُ جیڑے بدل ءَ پہ مہر ءُ براتی ءَ گوں یک دگرا زندمان آ سر بہ کن اَنت.