جیش الادل ئے گل ءَ شستون ءُ پہرہ ءَ نزامی ٹولی ءَ گوں ٹکّر ءَ کُشگ بوتگیں وتی ھشت پدایی ئے پجّار شنگ کرتگ

رَسانک نیوز/ پنچشمبے 6 شہریور ماہ 1404 ءَ، جیش الادل ءِ سلاہ بندیں گل ءَ وتی ویڈیو رکاڈے شنگ کرتگ ءُ اے ویڈیو ءَ شستون ءُ پہرہ ءَ نزامی ٹولی ءَ گوں ٹکّر ءُ تیرگواری ءَ کُشگ بوتگیں وتی ھشت پدایی ئے پجّار ءَ گوشتگ.

اے پدایی آنے پجّار اے پیم ءَ گوشگ بوتگ: «شاکر رئیسی»، «ھالد ریگی»، مولوی مھمد ھیات ءِ چُک ءُ جالک ئے نندوک، «ابداللہ رئیسی»، «امیرھُسین درازھی»، «ابدلرھمن رئیسی»، «شپی مھمد سمالزھی»، 32 سالگ، نزر ءِ چُک، دُزاپ ءَ کورین دمگ ءَ گلوگاہ میتگ ءَ نندوک بوت، «دُرمھمد شئی زادہ» ءُ «مراد مزارزھی».

دیمترا ایرانے نزامی مستر ءُ سروکان ءَ منّتگ ءُ گوشتگ: اے ٹکّر آن ءَ نزامی ٹولی ئے کارمندے کہ آئی ءِ پجّار ءَ «جواد ابدللھی»، گلام ئے چُک، پہرہ ءِ بزمان دمگ ءِ نندوک گوشتگ، کُشگ بوتگ ءُ شستون ءُ پہرہ ءَ ھمیں ٹکّر آن ءَ سرجم 13 سلاہ بندیں مردم کُشگ بوتگ.

چارشمبے روچ ءَ 5 شہریور ماہ 1404 ءَ، شستونے ھوشگ دمگ ءَ گوں امنیتی باسک ءِ لوگے ئے سرا اُرش ءُ تیرگواری ءَ اے ٹکّر بُنگیج بوتگ ءُ پنچ سلاہ بندیں مردم چہ امنیتی ٹولی ءِ تیرگواری ءَ کُشگ بوتگ. ھمیں وھدا پہرہ ئے چاہ جمال دمگ ءَ امنیتی ٹولی ءَ نندوکیں لوگے ئے سرا اُرش ءُ تیرگواری کرتگ، اے ٹکّر ءَ ھشت سلاہ بندیں مردم ءُ یک امنیتی کارمندے کُشگ بوتگ.