جالک ءَ سلاہ بندین ءُ بے پجّاریں مردمانی تیرگواری ءَ بلوچے جنیں چُکے ئے ھوری ءَ، گونڈیں زھگے ٹپیگ بوتگ

رَسانک نیوز/ پنچشمبے روچ ءَ 6 شہریور ماہ 1404 ءَ، جالک ءَ ڈکّ یئے تہا سلاہ بندین ءُ بے پجّاریں مردمانی تَچکیں تیرگواری ءَ 18 سالگیں بلوچے جنیں چُکے ئے ھوری ءَ، 12 سالگیں گونڈیں زھگے ءَ تیر وارتگ ءُ ٹپیگ بوتگ.

ٹپیگ بوتگیں بلوچے جنیں چُکے پجّار «رازیہ امینی زادہ»، 18 سالگ، کیسر ءِ چُک، بَچلُک ئے پجّار «مُستپا سپاھی»، 12 سالگ، مسلم ءِ چُک، دوئیں جالک ءِ نندوک زانگ بوتگ اَنت.

گوشگ لوٹیت: اے تیرگواری ءَ رازیہ ءَ پنچ تیر ماں دست ءُ پاداں لگتگ ءُ مُستپا ءَ دو تیر ماں ران ءُ دست وارتگ ءُ ٹپیگ بوتگ اَنت، ھاندان ءُ لوگے مردمان، آیان ءَ پہ درمان ءَ شستونے نادراہجاہ ءَ سر کرتگ۔ گوشگ بوتگ: آیانی ھالت ھراب اِنت بلے دراہ بوھگے اُمیت اِنت.

اے ھالے رِد ءَ، جنوکیں مردماں گوں گاڑی ءَ ڈکّ ءَ تہا بوتگ اَنت ءُ بید چہ اَڑ ءُ جیڑہ یا کہ پیسرگیں گپّے ءَ اے دوئیں زھگ تیرانے آماچ کرتگ ءُ چہ جاہ ءَ دَر شُتگ اَنت.

گوشگ لوٹیت: چہ اے ویل ءَ یک روچی دیمترا ھمیں وڑیں ویلے ماں جالک ءِ کلّگان دمگ ءَ پیش اَتکگ ءُ چہ سلاہ بندین ءُ بے پجّاریں مردمانی تیرگواری ءَ بلوچے جنیں آدمے کہ آئی ءِ پجّار «پرزانہ پازلی»، 32 سالگ، جالک ءَ کلّگان ءِ نندوکیں مردمے گوشتگش، تیر وارتگ ءُ ٹپیگ بوتگ. اے ویل ءُ واک آن ءَ دمگ ءِ نندوکیں مردماں، سکّ دل پریشان کرتگ ءُ ایرانے سرکارے ناکامی ءُ کمزوریاں پہ بلوچستان ءِ دمگاں ایمن گنگ ءَ درا کنت.