پہرہ ءَ سلاہ بندیں مردمانے ءُ نزامے ٹولی ئے ٹکّر ءَ چہ دوئیں نیمگ آں لہتیں مردم کُشگ ءُ ٹپیگ بوتگ

رَسانک نیوز/ چارشمبے 5 شہریور ماہ 1404 ءِ بانگواہ ءَ، پہرہ ئے چاہ‌جمال دمگ ءَ ایرانے نزامی ءُ امنیتی باسک ءِ ٹولی ءَ لوگے ئے سرا اُرش کرتگ، لوگے سلاہ بندیں نندوکان ءَ گوں آیاں ٹکّر زورتگ ءُ چہ دوئیں نیمگ آں لہتیں مردم کُشگ ءُ ٹپیگ بوتگ.

رَسانک ءِ ھال سرکنوکان ءَ گوشتگ: اے ٹکّر ءَ نزامی ٹولی ئے کارمند ے کہ آئی ءِ پجّار ءَ «جواد ابدللھی»، پہرہ ئے بزمان دمگ ءِ نندوکیں مردمے زانتگ، کُشگ بوتگ.

گوشتگ اِش: نزامی ٹولی ءَ گوں آر پی جی ءُ دستی بمب ءُ دگہ گرانیں سلاہ آں اے لوگے سرا اُرش کرتگ ءُ وتی بے نندوکیں بالگراب ھم کار گپتگ اَنت. چہ تراک آنے توار ءَ زمیں سُرتگ ءُ کش ءُ کِرّیں لوگانے شیشگ پُروشتگ اَنت ءُ سیاھیں دوتے آسمان ءَ چِست بوتگ.

ھال سرکنوکان ءَ گوشتگ: اے ٹکّر ئے جاگہ پہرہ ئے چاہ‌جمال دمگ ئے ھیّام 22 ءِ روڈ بوتگ۔ امنیتی ٹولی ءَ ھمیں دمگ ءِ سرا اُرش ءُ تیرگواری کرتگ۔ چہ تراک آنے زورا زمین سُرتگ. گوشگ بوتگ: نزامی ٹولی ءَ اے اُرش ءَ بے نندوکیں بالگراب ھم کارمرز کرتگ.

کُدس بُنجاہ ءِ سپاہ ءِ زمینی باسک ءَ گونڈیں جارتاکے شنگ کرتگ ءُ گوشتگ: سپاہ ءَ پہرہ، واش ءُ شستون ءَ «دھشتگرد ءُ تروریست آنے»، ھلاپ ءَ سئے کاروائی کرتگ۔ اے کاروائیان ءَ لہتیں چہ سلاہ بندیں مردماں کُشگ ءُ لہتیں دگہ دزگیر کنگ بوتگ.

نندوکین ءُ آبادیں دمگان ءَ چہ زوریں کاروائی ئے کنگ ءَ کش ءُ کِرّیں لوگان ءَ نُکس ءُ ھسارت ءَ بید، پہکیں دمگ ءَ ترس ءُ بیم داتگ۔ سپاہ ءِ سروکان ءَ اے کاروائی ءَ دمگ ءَ بوتگیں نُکس ءُ ھسارت آنے باراوا ھچ نہ گوشتگ، نہ کہ دمگے جھمنندیں مردمانے ھالات ءِ بابت ءَ گپّے جتگ.