رَسانک نیوز/ چارشمبے 5 شہریور ماہ 1404 ءَ، میرجاوہ ءُ دُزاپ ئے بازیں جھمنندے ءَ پہ سرکار ے روتگ ءِ سیمسراں بند کنگ ءَ اُستاندار ے کارگِس ءِ دیم ءَ مُچ بوتگ ءُ پر امنیں زھرشانی کرتگ. جھمنندان ءَ چہ سرکار ءَ لوٹتگ کہ میرجاوہ ئے روتگ سیمسران ءَ پدا پچ بہ کنت. ھمیں پیم آیان ءَ گوں سرکارے تانکری سسٹم ءَ وتی پر امنیں زھرشانی کرتگ.
دیمترا ماں 29 مرداد ماہ ءَ، دُزاپ ءَ اُستاندار ے کارگِس ءَ گوں منسور بیجار اُستاندار ءُ ھلیل آبادی سپاہ ءِ کماندار ءُ جرنیل ئے سروکی ءَ پہ روتک ئے سیمسرانے دوبارگ پچ کنگ ءَ دیوانے برجم دارگ بوتگ، اے دیوان پیشگیں دیوان آنے وڑا پہ جاھے سر نہ بوتگ. دیوان ءَ بلوچ کبیلہ آنے سروکین ءُ کماشیں مردمان ءَ بہر زُرتگ، سرکارے داتگیں کول آنے رِد ءَ ھمیں روچ روتک ئے سیمسرانے پچ کنگ ءِ روچ گوشگ بوتگ. سرکار ءَ وتی پیسرگیں کول آنے وڑا، اے کول ھم پُروشتگ ءُ روتک ئے سیمسراں داں انگت ءَ بستگ اَنت.
گوشگ لوٹیت: دوشمبے روچ ءَ 20 مرداد ماہ ءَ میرجاوہ ئے بازیں جھمنندے ءَ پہ سرکارے روتک ءِ سیمسراں بند کنگ ءَ استاندارے کارگِس ءِ دیم ءَ مُچ بوتگ اَنت ءُ زھرشانی کرتگ۔ آیاں زمہ واران ءُ کارمستران ءَ پہ وتی کول آنے پروشگ ءَ ائیر جتگ. سپاہ ءَ پہ مردمانی زھرشانی ئے کم کنگ ءَ چہ کماش ءُ اسپیت ریشیں مردمانے بہروسہ ءَ سوبیں بوھگ ءِ جُھد کرتگ، داں سیمسرانے بند کنگ ءِ کسور ءَ دگہ ادارہ آنے سرا بہ لیٹ اِینیت.
ھمیں وڑا 17 مرداد ماہ ءِ روچ ءَ، ٹیلکش آنے دہ آں گاڑی روتک ءِ سیمسراں بے آپ ءُ ساھگ ءَ ماں گرماگ ئے روچاں پہ باڈر ے پچ بوھگ ءِ ودارا بوتگ اَنت۔ بلے سپاہ ءِ مستران ءَ چہ ٹیلکش آن ءَ لوٹتگ، ٹیل آں ھالیگ بہ کن اَنت ءُ چہ اُداں برو اَنت. ٹیلکش آن ءَ سپاہ ءِ اے گپّ نہ منّتگ۔ ھمیں گپّ ءِ سرا باڈر ءِ نزامی سروکان ءَ گوں لوڈر ءُ ٹرک ءَ سیمسرانے دربوھگ ءِ راہاں ھاک رھتگ ءُ بستگ.
Be the first to comment