سرباز ءَ سلاہ بندیں مردیئے تیرگواری ءَ بلوچے کُشگ بوتگ

رَسانک نیوز/ 2 شہریور ماہ 1404 ءَ، سرباز ءِ نسیرآباد دمگ ءَ چہ سلاہ بندیں مردیئے تیرگواری ءَ بلوچے تیر وارتگ ءُ کُشگ بوتگ.

رَسانک ءَ کُشگ بوتگیں بلوچے پجّار «ھلیل وتن ھا»، ابدلکادر ئے چُک، آروس کرتگ ءُ زھگانے پت، بُندر ءَ سرباز ءِ نسیرآباد دمگ ءِ مردمے زانتگ.

رَسانک ءِ ھال سرکنوکانے رد ءَ، ھماں وھدا کہ ھلیل مکانیکے دکان ءَ تہا بوتگ، نسیرآبادے نندوکیں مردے ءَ آئی ءِ سرا تیرگواری کرتگ، تیر ورگ ءُ ٹپیگ بوھگ ءَ پد، ھلیل ءَ نادراہجاہ ءَ سر بوھگ ءَ پیسرا ماں سرباز ءُ پہرہ ئے میان راہ ءَ ساہ داتگ.

ھال سرکنوکان ءَ گوشتگ: نواز بلیدہ ای ماں سال 1400، شھرام وتن ھا یک ماہ دیمترا، کہ دوئینا نسیرآبادے نندوکیں مردم بوتگ اَنت، ھر دو آں چہ سلاہ بندیں مردمان ءُ انتزامی ٹولی ئے تیرگواری ءَ کُشگ بوتگ اَنت، آیانے کھول ءُ لوگے مردمان ءَ پہ اِنساپے لوٹگ ءَ وتی شکایست اِنساپ دیوکیں ادارہ ءَ جما کرتگ، بلے داں انگت سوبیں نہ بوتگ اَنت.

بلوچستان ءَ سپاہ ءِ بہر کرتگیں بازیں سلاہ آن ءَ، اُدے نندوکانے ایمنی گیش نہ کرتگ، بلکے کبیلہ آنے میان ءَ ھمیں پیم ءَ زاتی اَڑ ءُ جیڑاں گیشتر کرتگ. بازیں اَڑ ءُ جیڑہ ءُ ٹکّر ے کہ گُڑ سرا پہ ھون ءُ کوش ءَ سربوتگ اَنت، آیانے بُن ءُ ریشّگ ھمیں سیاست زانگ بوتگ. راستیں گپّ ھمیش اِنت کہ بلوچستان ءَ بازیں جھمنندے، امنیتی ادارہ آنے بازیں سلاہ ے بہر کنگے سیاست ے دیم ءَ ندر بوتگ اَنت، سپاہ ءِ پاسداران اے سیاست ے کارمرز کنگ ءَ چہ اے دگہ امنیتی ادارہ آں دیمتر اِنت.