رَسانک نیوز/ 28 مرداد ماہ 1404 ءِ بیگاہ ءَ، پہرہ ئے کلاھدوز دمگ ءَ، برگ ءِ نیروگاہ ئے نزّیک ءَ، سلاہ بندین ءُ بے پجّاریں مردمان ءَ بلوچے ئے سرا ھماں وھدا تیرگواری کرتگ ءُ کُشتگ کہ آئی وتی ھاندانے ھوری ءَ چہ لوگ ءَ در بوھگ ءَ بوتگ.
اے بلوچے پجّار «وھید کلندرزھی»، ھبیب ءِ چُک، بُندر ءَ واش ءِ مردم ءُ انّیگیں وھدا پہرہ ئے جھمنند زانگ بوتگ.
رَسانک ءِ ھال سرکنوکان ءَ گوشتگ: ھماں وھدا کہ وھید لوٹتگ وتی ھاندانے ھوری ءَ چہ لوگ ءَ در بہ کپیت گوں لوگے دروازگ ئے پچ بوھگ ءَ، سواری گاڑی ئے سلاہ بندیں نندوکاں آئی ءِ پدا کپتگ اَنت ءُ آئی ءِ سرا تیرگواری کرتگ ءُ کُشتگ.
جنوکانے پجّار ءُ آیانی سوب چہ اے کارا داں انگت ءَ زانگ نہ بوتگ.
گوشگ لوٹیت: دیمترا ماں تاریک 15 مرداد ماہ 1404 ءَ، وھید ئے برات کہ برگ ئے ادارہ ءَ کار ءَ بوتگ گوں برگ ءِ پادگ ءِ لیٹ ورگ ءَ کُشگ بوتگ.
واش ءَ اُمرزھی ءُ کلندرزھی کُٹھمدان آنے میان ءَ انّیگیں ھونیں اَڑ ءُ جیڑاں پد، گمان ھمیش اِنت کہ وھید ئے کُشگ ءَ ھماں مردمانے دست ھور بوت کنت کہ لوٹنت اے دوئیں کبیلہ آں گیشتر بہ اَڑ اَنت. اے درگت ءَ اُمرزھی کُٹھمدانے لہتیں مردمان ءَ گوں رَسانک ءِ ھال سرکنوکان ءَ گوشتگ: وھید ئے کُشگ ءَ آیاں ھچ پیمیں کرد ے نہ بوتگ۔ آیان ءَ گوشتگ ما دوئیں کبیلہ آنے میان ءَ گیشیں ٹکّر ءُ ھونے ریچگ ءِ ھلاپیں.
Be the first to comment