رَسانک نیوز/ جمے 24 مرداد ماہ 1404 ئے بیگاہ ءَ، دُزاپ ءَ مولوی ابدل ھمید اسمائیل زھی ءُ شہ بکش کُٹھمدانے کماش ءُ سروکیں مردمانے جُھد ءُ میانجی گری ءَ اے کبیلہ ئے دو برات رند آنے (داروزھی) ءُ (پکیرزھی) میان ءَ پد چہ چُنت سال اَڑ ءُ جیڑہ رازی نامہ ءُ سلاھ کاری بوتگ.
اے دیوان دُزاپ ءِ دارالاُلوم ئے آپیس ءَ گوں مولوی ابدل ھمید ئے سروکی ئا برجم دارگ بوتگ، کہ آئی ءِ تہا بازیں کماش ءُ اسپیت ریشان ءَ بہر زُورتگ. دیوان ءَ دو مردمے ھون ءُ کوش ئے درگت ءَ گپّ ءُ تراں بوتگ، ھمیں کوش آنے سوب ءَ دوئیں برات رند گوں یکّ ءَ دگرا اَڑتگ اَنت.
دیوانے گُڑ سرا دوئیں نیمگے مردمان ءَ پہ ھون بہائے دیگ ءَ منّتگ، اے پیم ءَ پد چہ ھپت سال اَڑ ءُ جیڑہ دوئیں برات رند آنے میان ءَ سلاھ کاری بوتگ. اے دیوان ءَ دو بلوچے برات رند آنے ھور کنگ ءَ بید، کماش ءُ اسپیت ریشانے وکار، اِزّت ءُ اَردِشت ءَ پہ جیڑہ ءُ جنجال آنے سندگ ءَ درا کرتگ.
Be the first to comment