مگس ءَ برگانے گیش روگ ءَ، یک سالگیں چُکے ءَ چہ مارے ڈنگ جنگ ءَ ساہ داتگ

رَسانک نیوز/ 19 مرداد ماہ 1404 ءِ شپ ءَ، مگس ءِ ایرکشان دمگ ءَ گوں برگانے گیش روگ ءُ بازیں گرمی ئے سوب ءَ لوگے ئے دروازگ پچ بوتگ ءُ مارے تہا گوستگ ءُ یک سالگیں چُکے ءَ ڈنگ جتگ ءُ چُک ءَ جاہ ءَ ساہ داتگ. برگے نہ بوھگ، موبایلانے آنتن ءِ شرّی ئے سرا کار نہ کنگ ءُ الکاپیں راہ ئے نہ بوھگے سوب ءَ پیش چہ ایشی ءَ کہ کمکے پہ چُکے ساہ ئے رکّینگ ءَ سر بہ بیت آئی ءَ ساہ داتگ.

اے چُکے پجّار «راھیل ودکار»، یک سالگ، آرپ ءِ چُک، مگس ءِ ایرکشان دمگے نندوک زانگ بوتگ.

آیان ءَ کہ چمّ وت اے ویل ءَ دیستگ ءُ گوشتگ: اے مار چہ ڈنّ ئے ڈوک ءُ ھاکاں لوگے تہا گوستگ، برگے نہ بوھگ ءُ تہارے ءَ لوگے مردمان ءَ نہ توانتگ پدکردی بہ کن اَنت۔ لوگے مردمان ءَ گوشتگ: برگے نہ بوھگ ءُ بازیں گرمی ءَ آیاں ناچار کرتگ کہ لوگے دروازگ ءُ دریگاں پچ یلا بہ کن اَنت، اے گپّ ءَ مار ءُ زومانی ڈنگ جنگے ھتر گیش کرتگ.

گوشگ لوٹیت کہ سیاہ مار یکے چہ زھر دارین ءُ ھترناکتریں ماراں زانگ بیت۔ اے مار گیشتر ماں بلوچستانے میانی دمگاں مگس، سرباز، شستون، گِہ، کسرکند ءُ راسک ءَ پدی گندگ بیت۔ ھمیں نزّیکیں وھداں بازیں جھمنندے چہ مارانے ڈنگ جنگ ءَ کُشگ ءُ ٹپیگ بوتگ اَنت۔ بلے داں اے وھدا ایرانے درمان ءِ وزارت ءَ پہ مار ءُ زومانی ڈنگ ءُ زَھر ءَ ھچ پیمیں سوچن ءُ درمانے جوڑ نہ کرتگ.