
رَسانک نیوز/ زی دوشمبے روچ 6 مرداد ماہ 1404 ءَ، میناب ءِ بندیگجاہ ءَ دو بلوچے بندیگ کہ دیمترا پہ مواد ءُ منشیات ءِ الزام ءَ دزگیر کنگ بوتگ اَنت ءُ اُدے انکلاب آمیدگس ءَ آیاں پاھو ئے هُکم داتگ، شمبے 4 مرداد ماہ ءَ میناب ءِ بندیگجاہ ءَ آیاں چہ ھوریں واڈ ءَ پہ ایوکیں واڈ ءَ شور دیگ بوتگ اَنت ءُ آیانی لوگے مردمان ءَ پہ گڑ سریں گندوک ءَ لوٹتگ.
پاھو دیگ بوتگیں بلوچانے پجّار «ایسا نارویی (نادری)»، 35 سالگ، جمے چُک، پنوچ ءَ کتیچ دمگ ءِ کرھمت میتگ ءِ نندوکیں مردمے، «امیر کمبری»، 26 سالگ، دادشاہ ئے چُک، آروس کرتگ ءُ دو زھگے پت، دلگان ئے نندوکیں مردمے زانگ بوتگ.
سربوتگیں ھالانی رد ءَ، ایسا نارویی سال 1399 ءُ امیر کمبری شش سال دیمترا میناب ءَ پہ منشیات ءُ مواد ئے الزام ءَ دزگیر کنگ بوتگ اَنت ءُ اُدے انکلاب آمیدگس ءَ آیاں پاھو ئے هُکم داتگ۔ 5 مرداد ماہ 1404 ءَ آیان ءَ گوں وتی لوگے مردمان ءَ گڑ سریں گندوک ءُ دیدار کرتگ.
گوشگ لوٹیت: ایران ءَ پہ منشیات ءِ الزام ءَ پاھو ئے هُکم ئے دیگ انسانی ھکّانی گل ءِ شرگداری گوں ھور بوتگ۔ انسانی ھکّانی گل ءَ منشیات ءُ مواد ئے پروندہ آنے تہا جُست ءُ پرس ءِ وھداں لٹ ءُ شاپ ءُ زورے سرا منّینگ، وکیل ئے دارگ ءَ نہ ھلّگ، نااِنساپے ئے سرا پروندہ آنے دیم ءَ برَگ ءَ چہ انسانی ھکّانی پادلپاش کنگ زانتگ.
Be the first to comment