دُزاپ ءَ جیش الادل ءَ مزنیں آمیدگس ئے ماڑی ئے سرا دو ھونئیں اُرش کرتگ، 31 مردم کُشگ ءُ ٹپیگ بوتگ

رَسانک نیوز/ زی سُہبی شمبے 4 مرداد 1404 ءَ، جیش الادل ءِ سلاہ بندیں گل ءَ دُزاپ ءِ آزادی روڈ ءَ مزنیں آمیدگس ئے ماڑی ءِ سرا دو ھونئیں اُرش کرتگ۔ جیش الادل ءَ اے کاروائی ئے نام اِنساپ ءِ باسک ائیر کرتگ۔ اے اُرش ءَ سلاہ بندیں مردمان ءَ پیسرا کازیانے دپتر ءُ آپیس، تیرانی آماچ کرتگ ءُ پد چہ ایشی ءَ گوں امنیتی ءُ نزامی باسکانے ٹولی ءَ ٹکّر زورتگ ءُ جنگ داتگ.

اے اُرش ءِ دومئیں بہر ءَ جیش الادل ئے پدائیان ءَ گوں دستی بمب ءُ ھُمپارگ ءَ امنیتی باسکانے سرا اُرش کرتگ. اے کاروائیان ءَ لہتیں چہ امنیتی باسک ءُ آمیدگس ئے کارمنداں کُشگ ءُ ٹپیگ بوتگ. اُرش ئے دومئیں بہر ءَ آمیدگس ئے کش ءُ کِرّاں، زوریں تراک آن ئے توار اِشکونگ بوتگ ءُ بزیں دوتی چہ آمیدگس ئے ماڑی ءَ چِست بوتگ. امنیتی باسک ءِ ٹولی ءَ آمیدگس ئے ماڑی ءَ گوں ھمدپیں روڈ بستگ اَنت ءُ چہ آیانے کورین ءُ وت سریں تیرگواری ءَ بازیں جھمنندے ٹپیگ ءُ کُشگ بوتگ.

چُنت ساھت پد چہ اے اُرش ءَ، جیش الادل ءَ کسانیں جارتاکے شنگ کرتگ ءُ اے کاروائی ئے زمہ واری منّتگ۔ جیش الادل ءَ اے اُرش، ایرانے اِنساپ دیوکیں ادارے، بلوچانے سرا زلم ءُ آیان ءَ وت سر پاھو دیگ ءُ پادلپاش کنگ ئے پسو زانتگ. ھمیں پیم اے گل ءَ اُرش کنوکان ءَ «پہ ھُدائے اِنساپ ءَ پدائی» گوشتگ، کہ پہ اِنساپ ءِ برجم دارگ ءُ پاھو دیگ بوتگیں ءُ پادلپاش کرتگیں مردمانے بیہڑے گِرَگ ءَ اے کاروائی کرتگ.

داں اے وھدا، کُشگ ءُ ٹپیگ بوتگیں مردمانے کچ بازیں وڑ ءُ پیم ءَ گوشگ بوتگ۔ اِنساپ دیوکیں ادارے کچے رد ءَ، 5 مردم کُشگ ءُ 18 دگہ ٹپیگ بوتگ۔ سپاہ ءِ کُدس ئے کچ ئے رد ءَ، 6 مردم کُشگ ءُ 22 دگہ ٹپیگ بوتگ۔ اگاں کُشگ بوتگیں سئے پدائی اے کچ ءَ گیش بہ بنت، گڑا سرجم 31 مردم کُشگ ءُ ٹپیگ بوتگ.

اے اُرش ءُ ٹکّر چہ سُہب ءِ ساھت 8:50 ءَ بنگیج بوتگ ءُ داں ھلاس بوھگ ءَ سئے ساھت ءَ گیش وھد زورتگ۔ سرکار ءَ دُزاپ ءِ امنیتی ھالت سکّ ءَ ثھد کرتگ. مردمان ءَ گوشتگ: اُرش ئے وھدا امنیتی باسک ءِ ٹولی ءَ رھگوزیں مردمانی سرا بے رھبندین ءُ کوریں تیرگواری کرتگ. آمیدگس ءُ آزادی روڈ ءَ گوں ھمدپیں راھش بستگ اَنت. بلوچستان ءُ سیستان ءَ اِنساپ دیوکیں ادارے سرا انّیگیں اُرش بے مَٹّ ءُ در وریں اِنت، اے ادارے سرا چہ اداں پیش اے پیمیں کاروائی نہ بوتگ.

اے اُرش ءَ، امنیتی ءُ اِنساپ دیوکیں ادارے سُستی ءُ کمزوریاں پہ بلوچ راجے لوٹے منّگ ءَ درا کرتگ۔ بلوچ راج سالانے سال اِنت کہ ڈلگچاری ءُ در چہ اِنساپ ءَ پاھو بوھگ، اِنساپ دیوکین ءُ امنیتی ادارے ھژم ئے دیمپان اِنت. سرکاری ادارہ آنے پسّو نہ دیگ، ھکّ ءُ لوٹے نہ منّگ، الّم ءَ اے پیمیں پد کرد ءَ گوں ھمگرنچ بنت.