بمپور ءَ سلاہ بندیں مردمانی تیرگواری ءَ بلوچے جنیں چُکے کُشگ بوتگ ءُ امنیتی باسک ءِ ٹولی ءَ آئی ءِ پت دزگیر کرتگ

رَسانک نیوز/ چارشمبے 1 مرداد ماہ 1404 ءِ بیگاہ ءَ، بمپور ئے ریکپوت دمگ ءَ سلاہ بندیں مردمان ءَ لوگے ئے دیم اُشتوکیں گاڑئے سرا تیرگواری کرتگ، اے تیرگواری ءَ بلوچے جنیں چُکے کُشگ بوتگ ءُ پنچشمبے روچ ءَ 2 مرداد ماہ ءَ امنیتی باسک ءِ ٹولی ءَ آئی ءِ پت دزگیر کرتگ.

اے بلوچے جنیں چُکے پجّار «ھوریا شہ‌بکش»، 14 سالگ، ابدلگپورئے چُک ءُ آئی ءِ پت ئے پجّار «ابدلگپور شہ‌بکش»، 51 سالگ، ابدل‌اللہ ئے چُک، آروس کرتگ ءُ دو زھگے پت، پہرہ ءَ ریکپوت دمگ ءِ نندوکیں مردمے زانگ بوتگ.

رَسانک ءِ ھال سرکنوکان ءَ گوشتگ: چارشمبے ساھت 19 ءَ، ھماں وھدا کہ شہ‌بکش ئے ھاندان لوگ ءَ چہ ڈنّ روگ ءَ بوتگ اَنت ءُ گاڑئے سوار بوھگ ءَ گوں سلاہ بندیں مردمان ءَ آیانی سرا تیرگواری کرتگ. شہ بکش ئے گاڑی گیس ئے سرا ھلّوکیں گاڑئے بوتگ ءُ تیرگواری ءَ گوں گاڑی بُن گپتگ ءُ سُہتگ. اے تیرگواری ئے بُن ءُ ریشگ جنیں چُکے پت ئے کُہنیں اَڑ ءُ جیڑے بوتگ. سلاہ بندیں مردمانی سوب چہ تیرگواری ءَ آئی ءِ پت ئے کُشگ بوتگ۔ بلے بھت ءَ جنیں چُک ءَ ماں سرا تیر وارتگ ءُ جاہ ءَ ساہ داتگ.

گوشگ لوٹیت: ابدلگپور شہ‌بکش ریکپوت دمگ ءَ یکے چہ سپاہ ئے ڈلگیں کارندگاں زانگ بیت ءُ بسیجے دپترئے مستر اِنت. ۲ مرداد ماہ ءَ، پہرہ ئے چیریں ادارہ ءَ آئی دزگیر کرتگ ءُ داں اے وھدا آئی ءِ ھال سرپدئے نیست اِنت ءُ آئی ءِ دارگ ئے جاگہ زانگ نہ بوتگ.