پہرہ ءَ بلوچے جنیں آدمے چہ ڈاکٹرئے نازانت کاری ءُ درمان ئے بنیادی سہولیات ءِ نہ بوھگ ءَ ساہ داتگ

رَسانک نیوز/ سئے شمبے روچ 24 تیر ماہ 1404 ءَ، پہرہ ئے نندوکیں جنیں آدمے کہ آئی ءِ نام «پری برھانزھی» گوشگ بوتگ۔ جنیں آدم آنے چُک مات کنوکیں ڈاکٹر ءَ رواگ ءَ پد، ڈاکٹرئے نازانت کاری ءُ آئی ءَ پہ ھکیریں چمّی ءَ چارگ ءَ، زندگ داروکیں بنیادے سہولیات ئے نہ بوھگ، پری ءَ زھنی جنجال ءَ دور داتگ ءُ آئی ءَ دل ءَ گپتگ ءُ ساہ داتگ. اے نادراہجاہ ءَ نہ درمان بوتگ ءُ نہ ایمرجنسی سہولیات، اے ڈاکٹر ءَ زندگ داروکیں بنیادے سہولیات ھم نہ داتگ.

اے ویل ءَ «پری برھانزھی»، 43 سالگ، رواں‌بکش ءِ چُک، سئے زھگے مات، لاپ ءَ کولنجے درمان ءَ ڈاکٹر «شیریں بزرگزادہ» ئے کلینک ءَ شُتگ. اے جنیں آدمے لوگے مردمانے رِد ءَ، ڈاکٹر ءَ گوں پری ئے چارگ ءَ، ھکیری سرا گوشتگے: تو پرچا زندگے ؟ تو داں اے وھدا باید اَت کہ بہ مُرتیں نے.

آئی ءِ سیادان ءَ گوشتگ: ڈاکٹرئے بدیں پیش آھگ ءُ گپّ آں، پری ءَ سدمہ داتگ ءُ آئی ءِ زھنی جنجال گیش کرتگ اَنت. یکّے چہ پری ئے سیادان ءَ گوں دمگ ءِ ھال سرکنوکے ءَ گوشتگ: ڈاکٹرئے اے پیم پیش آھگ ءَ پد، چہ نا جوڑیں پری ءَ لوٹتگ کہ زوت ءَ پہ آپریشن ءَ تیار بہ بیت ءُ چیزے زرّ پہ رشوت ءَ بہ دنت. ھمیں وھدا پری ئے ھالت ھراب بوتگ ءُ نادراہجاہ ءَ نہ ایمرجنسی برگ ئے سسٹمے بوتگ ءُ نہ اکسیژن ئے کپسول ءُ زندگ داروکیں دگہ سہولتے. ڈاکٹر ءَ ھم نیمون کرتگ ءُ گوشتگ: برگ نیست اِنت ءُ کارے چہ مئے دست ءَ شر بوت نہ کنت۔ ڈاکٹرئے سُست کاری ءُ بنیادی سہولیات ءِ نہ بوھگ ءَ، پری ءَ ھماں کلینک ءَ دل ءَ گپتگ ءُ ساہ داتگ.

پری ئے لوگے مردمان ءَ گوشتگ: اگاں کلینک ءَ بنیادی سہولت دسرس ءَ بوتیں، پری ئے ساہ الّم ءَ رکّ اِتگت. آئی ءِ لوگے مردمان ءَ چہ زمہ واران ءَ لوٹتگ: اے ویل ءُ واک ئے پُژدر ءَ تَچکی ءَ دیم ءَ بیار اَنت ءُ راستے زانگ بہ بیت.