رَسانک نیوز/ سئے شمبے 31 تیر ماہ 1404 ءَ، دُزاپ ءِ کریم آباد دمگ ءَ چار سلاہ بندین ءُ بے پجّاریں مردمان ءَ بلوچے ئے لوگے سرا اُرش کرتگ ءُ گوں تَچکیں تیرگواری ءَ آئی ءَ تیرانے آماچ کرتگ. اے بلوچ ءَ ماں لاپ ءَ دو تیر وارتگ ءُ سکّ ءَ ٹپیگ بوتگ، آئی پہ درمان ءَ دُزاپ ءِ ھاتم الانبیاءِ نادراہجاہ ءَ سر کنگ بوتگ، بلے ٹپّانی باز بوھگ ءَ آئی ءَ روچے پد چہ اے ویل ءَ ساہ داتگ.
اے بلوچے پجّار «نِمت اللہ براھویی (نارویی)»، ابدلاللہ ئے چُک، دُزاپ ءِ نندوکیں مردمے زانگ بوتگ.
رَسانک ءِ ھال سرکنوکان ءَ گوشتگ: اے ویل ءُ واک ھماں وھدا پیش اَتکگ کہ نِمت اللہ چہ زھک ءَ واتر کرتگ ءُ دُزاپ ءَ وتی زاتی لوگا سربوتگ. چار بے پجّارین ءُ سلاہ بندیں مردمان ءَ آئی ءِ لوگے سرا اُرش ءُ تیرگواری کرتگ. داں اے وھدا جنوکانے پجّار ءُ آیانی سوب چہ اے کار ءَ زانگ نہ بوتگ.
Be the first to comment