سب ءُ سوران ءَ، امنیتی باسک ءِ لوگے ئے سرا اُرش ءُ تیرگواری ءَ بلوچے کُشگ بوتگ

رَسانک نیوز/ یکشمبے 29 تیر ماہ 1404 ءَ، سب ءُ سوران ءِ دمگ گَنُک ءَ امنیتی باسک ءِ لوگے ئے سرا اُرش ءُ تیرگواری ءَ بلوچے تیر وارتگ ءُ کُشگ بوتگ.

رَسانک ءَ اے بلوچے پجّار «مھمد دھانی»، 30 سالگ، ھسن ءِ چُک، سب ءُ سوران ءِ گنُک دمگ ءِ نندوکیں مردمے زانتگ.

رَسانک ءِ ھال سرکنوکان ءَ گوشتگ: مروچی سُہب ءِ ساھت 10 ءَ، امنیتی باسک ءُ چیریں ادارہ ءَ گوں دہ گاڑی ءَ گیش مھمد ئے لوگے سرا اُرش ءُ تیرگواری کرتگ. مھمد ءَ ھم پہ وتی ساہ ءِ رکّینگ ءَ امنیتی باسک ءِ ٹولی ءَ گوں ٹکّر زورتگ ءُ آیانی سرا تیرگواری کرتگ۔ پد چہ ایشی ءَ کہ مھمد ئے تیر ھلّتگنت آئی ءَ چہ امنیتی باسک ءِ تیرگواری ءَ ، تیر وارتگ ءُ ساہ داتگ.

ھال سرکنوکان ءَ گوشتگ: دیمترا، با اثریں مردمے ئا گوں اَڑ ءُ جیڑے سوب ءَ آئی دو سال بندیگے کشّتگ۔ پد چہ دمگ ءِ کماش ءُ سروکیں مردمانے جُھد ءَ آیانی میان ءَ رازی نامہ ءُ سلاھ کاری بوتگ، اے پیم ءَ مھمد چہ بندیگجاہ ءَ آجو بوتگ.

داں اے ساھت ءَ، امنیتی باسک ءِ اے مرد ئے لوگے سرا اُرش ءُ تیرگواری ئے پُژدر زانگ نہ بوتگ.