شستون ءَ، سپاہ ءِ کُشوکیں ٹولی ئے کارندگ «اورنگ سوری زھی» کُشگ بوتگ

رَسانک نیوز/ 27 تیر ماہ 1404 ءَ، شستون ءِ ھمزہ روڈ ءَ سلاہ بندین ءُ بے پجّاریں مردمانی تیرگواری ءَ سپاہ ءِ مرک ئے ٹولی ءِ کارندگ « اورنگ سوری زھی » کُشگ بوتگ. اورنگ ءَ پہ سرکارے ھلاپ ءُ نہ منّوکیں بلوچانے کُشگ ءُ دزگیر ءُ پادلپاش کنگ ءَ، مزنیں بہرے زُرتگ، شستون ءِ ھمزہ روڈ ءَ سلاہ بندین ءُ بے پجّاریں مردمانی تیرگواری ءَ کُشگ بوتگ.

گوشگ بوتگ: ھماں وھدا کہ اورنگ وتی توتا ھایلوکس گاڑی ءَ نندوک بوتگ، سلاہ بندین ءُ بے پجّاریں مردمان ءَ آئی ءِ سرا تَچکیں تیرگواری کرتگ ءُ چہ جاہ ءَ شُتگ اَنت.

رَسانک ءِ ھال سرکنوکان ءَ گوشتگ: اورنگ سوریزھی چہ سپاہ ءِ مزنین ءُ ڈلگیں کارندگ آں زانگ بوتگ. آئی یکے چہ سپاہ ئے کُشوکیں ٹولی ئے لیڈر ءُ کمانڈراں منّگ بوتگ. ماں سال ءِ 1401 ءَ، آئی  پہ سرکارے ھلاپیں بلوچانے پادلپاش کنگ ءُ کُشگ ءَ سپاہ ءِ چیریں ادارہ ءَ ھور بوتگ ءُ بلوچانے ھلاپ بازیں کاروائی آنے کمانڈر ءُ سروک بوتگ. آئی ءَ ماں ایران ءُ در ایران ءَ سرکارے نہ منّوکیں بلوچ کُشتگ اَنت.

گوشگ لوٹیت که ماں تاریک 29 تیر ماہ 1403 ءَ، جیش الادل ءَ اورنگ ئے جنَگ ءُ کُشگ ئے جُھد کرتگ، بلے سوبیں نہ بوتگ ءُ آئی چہ مرک ءَ رکّ اِتگ. اورنگ ئے کُشگ بوھگ، بلوچانے چہ سرکار ءَ نارازی ءُ آیانی زھرشانی ئے جُھلانکیاں درا کنت ءُ پیش دار اِیت. سرکار بلوچانی لوٹ ئے منّگ ئے جاہ ءَ، آیان ءَ پہ پادلپاش ءُ گُٹ گِر کنگ ءِ زورا داشتگ.