رَسانک نیوز/ یکشمبے بیگاہ 22 تیر ماہ 1404 ءَ، چھبار ءَ سپاہ ءِ چیریں ادارہ ءَ بلوچے ءَ بے سرکارے آڈر ءُ بے گناہ ءَ آوار جتگ ءُ چیریں جاگہے برتگ. چہ اے بلوچے دزگیری ءَ بگرے داں کہ روچ، مروچی آئی ءِ لوگے مردمان ءَ ھچ پیمیں ھالے سرپدئے دست نہ کپتگ. آیاں پہ الکاپین ءُ پکّائیں ھالے ءَ امنیتی ادارہ ءَ شُتگ اَنت بلے آیان ءَ ھم راستیں گپّ نہ گوشتگ.
اے بلوچے پجّار «پیمان ریگی ماریشان (ولانی)»، اسپندیار ئے چُک، 32 سالگ، بُندر ءَ واش ءِ مردم ءُ انّیگیں وھدا چھبار ءِ جھمنند زانگ بوتگ.
ھالانے رِد ءَ، اے بلوچ چھبار ءَ، لیپار شرکت ئے واھند بوتگ ءُ چہ دزگیر بوھگ ءَ دیمترا آئی ءَ چُنت بر ءَ چہ سپاہ ءِ چیریں ادارہ ءَ پون آتکگ ءُ بیہار اِش کرتگ کہ بیا وت ءَ مئے دست ءَ بدئے، گڑ سرا اے بیہار گوں آئی ءِ بیگواہ کنگ ءَ ھم گرنچ بوتگ اَنت.
سربوتگیں ھالانے رِد ءَ، پیمان ئے لوگے مردمان ءَ پہ آئی ءِ ھالے سرپدئے وتی جُھد کرتگ۔ بلے سپاہ ءِ چیریں ادارہ ءَ یکّیں پسّو داتگ: کہ پیمان پہ گیشتریں جُست ءُ پرس ءَ دُزاپ ءَ شور دیگ بوتگ. داں انگت ءَ، پیمان ئے باراوا گیشتریں ھالے دست نہ کپتگ.
Be the first to comment