رَسانک نیوز/ شمبے روچ 21 تیر ماہ 1404، چھبار ءَ نوکآباد دمگ ءَ آئے شمبے 17 تیر ماہ 1404 ءَ امنیتی باسک ءُ سلاہ بندیں مردمانی ٹکّر ءَ کُشگ بوتگیں، سلاہ بندیں مردیئے پجّار زانگ بوتگ. اے ٹکّر ءَ چہ دوئیں دیماں لہتیں کُشگ ءُ ٹپیگ بوتگ۔ سلاہ بندیں مردماں جیش الادل ءِ پدایی بوتگ اَنت.
اے سلاہ بندیں مردے پجار کہ جیش الادل ءِ پدایی ئے بوتگ «ابوالھسن اربابی (للہزھی)»، 28 سالگ، اسھاک ءِ چُک، راسک ءِ پشامگ دمگ ءِ نندوکیں مردمے زانگ بوتگ.
سئےشمبے بیگاہ ساھت 17:30 ءَ، پد چہ ایشی ءَ کہ سپاہ ءِ ٹولی یک پژو 405 گاڑئے پدا کپتگ، چھبار ءِ نوکآباد دمگ ءَ پژو گاڑئے سلاہ بندیں مردمان ءَ گوں سپاہ ءِ ٹولی ءَ ٹکّر زورتگ ءُ دو دیمیں تیرگواری بوتگ۔ اے تیرگواری ءَ چہ دوئیں دیماں لہتیں کُشگ ءُ لہتیں دگہ ٹپیگ بوتگ.
سپاہ ءِ ایردستیں مڈیائے اھبار ءَ اے ٹکّر ءِ باراوا گوشتگ: چھبار ءَ سپاہ ءِ سلاہ بندیں مردمانی گوں ٹکّر ءُ تیرگواری ءَ شش تروریست ءُ دھشتگرد کُشگ بوتگ ءُ اے اھبار ءَ دگہ سرجمیں ھالے نہ داتگ.
جیش الادل ءِ گل ءَ جمے 20 تیر ماہ 1404 ءَ، وتی جار تاک ءَ منّتگ کہ اے سلاہ بندیں مردماں آئی ءِ پدایی بوتگ اَنت۔ جیش الادل ءَ گوشتگ: چھبار ءِ نوکآباد دمگ ءَ پدائیاں ءُ امنیتی ٹولی ءِ ٹکّر ءَ چار پدایی ندر بوتگ ءُ چہ سپاہ ءِ ٹولی ءَ لہتیں کارمند ٹپیگ بوتگ.
Be the first to comment