رَسانک نیوز/ جمے روچ 20 تیر ماہ 1404 ءَ، سب ءُ سوران ءِ دمگ پسکوہ ءِ کہن کریم ئے میتگ ءَ، سلاہ بندین ءُ بے پجّاریں مردمان ءَ سروکیں بلوچی ئے لوگ ءِ سرا اُرش کرتگ۔ اے اُرش ءُ تیرگواری ءَ لوگے بانوک کُشگ بوتگ ءُ آئی ءِ دو چُک (یک جنیں چُک، یک مردیں چُکے) ٹپیگ بوتگ.
کُشگ بوتگیں جنیں آدم ئے پجّار «پاتمہ مھمدزھی»، 50 سالگ، ءُ آئی ءِ دو ٹپیگ بوتگیں چُک «مریم دومکزھی (شمبے زھی)»، 20 سالگ، «جواد دومکزھی (شمبے زھی)»، 30 سالگ، شاہ ھُسین ءِ چُک زانگ بوتگ.
گوشگ لوٹیت: پژو گاڑئے سلاہ بندین ءُ بے پجّاریں نندوکان ءَ میتگ ءِ سروکین ءُ کماشیں مردی ئے (شاہ ھُسین) لوگ ءِ دیم ءَ داشتگ ءُ دروازگ جتگ، شاہ ھُسین ءِ لوگی ءَ در کہ پچ کرتگ، آیان ءَ اے جنیں آدم ءَ تیرانے آماچ کرتگ ءُ لوگ ءَ تہا بوتگ اَنت ءُ لوگ ءِ جنک ءُ مردیں چُکے سرا تیرگواری ءُ ٹپیگ کرتگ.
جنوکانے پجّار ءُ آیان ءِ سوب چہ اے کار ءَ داں اے ساھت ءَ زانگ نہ بوتگ.
Be the first to comment