چھبار ءِ تیاب روڈ ءَ امنیتی باسک ءِ سرا اُرش کنوکیں سلاہ بندیں مردے پجّار زانگ بوتگ

رَسانک نیوز/ 20 تیر ماہ 1404 ءَ، چھبار ءِ تیاب روڈ ءَ امنیتی باسک ءِ ٹولی ءِ سرا اُرش کنوکیں سلاہ بندیں مردے پجّار زانگ بوتگ۔ اے اُرش ءُ ٹکّر ءَ امنیتی باسک ءِ ھپت کارمند کُشگ ءُ ٹپیگ بوتگ۔ سلاہ بندیں مرد، پد چہ دو ساھت زوریں ٹکّر ءَ کُشگ بوتگ.

کُشگ بوتگیں جیش الادل ءِ پدائیے پجّار «ابدلجلیل جرم (ملازھی)»، 24 سالگ، لتیپ ءِ چُک، راسک ءِ پیرزآبادے نندوکیں مردمے زانگ بوتگ.

گوشگ لوٹیت: اے اُرش ءَ امنیتی باسک ءِ سئے کارمند کُشگ ءُ 4 دگہ ٹپیگ بوتگ اَنت۔ سلاہ بندیں مرد ءَ گوں نوک سربوتگیں امنیتی باسک ءِ ٹولی ءَ ٹکّر زورتگ ءُ دو ساھت پد چہ دو دیمیں زوریں تیرگواری ءَ کُشگ بوتگ.

امنیتی باسک ءِ کُشگ بوتگیں سئے کارمند ے پجّار کہ توتا ھایلوکس گاڑئے نندوک بوتگ اَنت، اے پیم ءَ زانگ بوتگ: «ھمیدرزا میرشاھی»، «ھُسین جاپرنیا» ءُ «ابّاس بیرکی‌پرد».

جیش الادل ءِ گل ءَ گوں جار تاکے شنگ کنگ ءَ اے اُرش ءِ زمہ واری منّتگ ءُ گوشتگ کہ اُرش کنوکیں سلاہ بندیں مرد مئے پدائی بوتگ۔ اے گل ءَ گوشتگ: اے اُرش ءَ امنیتی باسک ءِ ھپت کارمند کُشگ ءُ ٹپیگ بوتگ.