دلگان ءَ، چیریں ادارے ٹولی ءَ بلوچے ءَ گوں گیش چہ دہ تیرے جنگ ءَ، میدانی پاھو داتگ

رَسانک نیوز/ شمبے 14 تیر ماہ 1404 ءِ بیگاہ ءَ، دلگان ءِ چاہ کیچی دمگ ءَ بلوچے گوں چیریں ادارے ٹولی ءِ تَچکیں تیرگواری ءَ کُشگ بوتگ. اے بلوچے پجّار «دادابّاس سابکی (آشوری)»، 40 سالگ، مھیم ءِ چُک، آروس کرتگ ءُ زھگانے پت، بُندر ءَ ھمیں دمگ ءِ نندوکیں مردمے زانگ بوتگ.

ابّاس وتی دمگ ءَ، کشارانی آپ ءِ موٹرے سرا اُشتوک بوتگ ھمیں وھد ءَ چیریں ادارے گاڑی گوں سلاہ بندیں نندوکاں آئی ءِ دیم ءَ داشتگ ءُ ده تیر ءَ گیش جتگ، تیرے ورگ ءَ پد ابّاس ءَ جاه ءَ ساه داتگ.

سر بوتگیں ھالے رِد ءَ، چیریں ادارے کارمندان ءَ ابّاس ءِ کُشگ ءَ پد، لوٹتگ کہ آئی ءِ بے ساھیں جون ءَ گوں وت ءَ بہ بر اَنت، بلے دمگ ءِ نندوکیں مردمان ءَ آیانی دیم داشتگ ءُ نہ ھشتگ اِش کہ آیاں اے کارا سوبیں بہ بنت.

زمہ واریں ادارے کارمستران ءَ اے ویل ءِ بابت ءَ داں انگت ءَ ھچ نہ گوشتگ، داں اے ساھت ءَ ابّاس ءِ لوگ ءِ مردمان ءُ سیادانے رندگِیری ھم بے پَسّو منتگ.

ابّاس ءِ بے دردیۓ سرا کُشگ، بلوچستان ءُ بلوچ راج ءِ سرا زلمے یک کسانیں مثالے، ھر روچ دہ ءَ چہ گیش بلوچ، گوں امنیتی باسکانے تیرگواری ءَ کُشگ بنت. اے ناشر کاریاں، انسانی ھکّان ءُ کانونے ھلاپ اَنت۔ اے درا کنت کہ سرکار بلوچ راج ءَ گوں ڈلگچاری ءُ ھکیریئے چمّاں چاراِیت.