رَسانک نیوز/ 11 تیر ماہ 1404 ءَ، راسک ءَ سپاہ ئے چیریں ادارہ ءَ پیسرگیں سیاسی بلوچ بندیگے «آمر گھرامزھی» ءَ، ھماں وھد ءَ دزگیر ءُ چیریں جاگہے برتگ، کہ آئی وتی زپت کرتگیں گاڑی ءِ رندگیری ءَ سرکاری آپیس ءَ شُتگ.
آمر گھرامزھی، دیمترا ماں 14 دی ماہ 1393 ءَ، دزگیر کنگ بوتگ ءُ پد چہ چار ءُ نیم سال بندیگ بوھگ، گرانیں زمانتے سرا آجو بوتگ. چارشمبے روچ ءَ امنیتی باسک ءَ، آئی ءَ دومئیں پِر ءَ ھماں وھدا کہ وتی زپت کرتگیں گاڑئے رندگیری ءَ شُتگ، چہ سرکارے آپیس ءَ آوار جتگ. گوشگ بوتگ: امنیتی باسک ئے کارمند آمرئے زپت کرتگیں گاڑی ءَ پہ وتی زاتی کاران ءَ کارمرز کرتگ.
آمرئے گاڑی سال 1393 ءَ، سپاہ ئے امنیتی باسک ءَ نسیرآباد دمگ ءِ سرا اُرش ءِ وھدا زپت کرتگ ءُ داں انگت ءَ داشتگ. آں اُرش ءَ سپاھے امنیتی باسک ءَ آمر گھرامزھی ءُ ابوبکر ملازھی ءَ گوں لہتیں دگہ بلوچے ورنا ءَ دزگیر کرتگ ءُ چُنت گاڑئے وت واجہی گرتک ءُ برتگ. اے گپّ ءَ دہ سال گوستگ بلے داں انگت ءَ سپاہ ئے امنیتی باسک ءَ، گاڑیان ءَ پد نہ تر اِنتگ.
امنیتی باسک ءِ وت سرا اے بلوچے دومئیں پِر ءَ دزگیر کنگ ءُ آئی ءِ زاتی سامانانے در کانون ءَ دارگ، کانونے سی ءُ دومئیں بہرئے ھلاپ زانگ بیت۔ ایرانے سرکاری کانون ءِ رِد ءَ، جھمنندانی در کانون ءَ بندیگ کنگ، جرم زانگ بیت ءُ سزائے ھکّ دار اِنت. ایرانے سرکاری کانون ءِ بیست ءُ دومئیں بہر ءَ گوشگ بوتگ: کہ جھمنندانی جان، مال، ھکّ، لوگ ءُ کار چہ دست دراجی بزاں دست ءِ جنَگ ءَ ایمن اَنت۔ ھچ کس در چہ کانون ءَ نہ توانت آیان ءَ بہ دار اِیت. ھمیں پیم ءَ، جھمنندانے گاڑیانی دارگ بید چہ زانگ بوتگیں آڈر ءُ سوب ءَ، در چہ کانون ءُ سزائے ھکّ دار اِنت.
Be the first to comment